2015年7月9日 星期四

赴湯蹈火 鄧健泓甘做石詠莉打雜 [壹週刊 - 1322] 石詠莉,鄧健泓,M1,



探熱針

赴湯蹈火 鄧健泓甘做石詠莉打雜

去年合作舞台劇《大酒店有個荷李活》同石詠莉撻着的鄧健泓,唔只出錢幫女友出 HiFi碟,更做埋攝影師 MV男主角同柴可夫司機,身兼多職,被全天候照顧,甜到漏的石詠莉稱男友做「打雜」。

賣贏泳兒

上個禮拜,鄧健泓做司機送石詠莉到太子,在旺角警署外停低讓女友落車便先行離開,原來二十八歲都未有車牌的石詠莉,約了教車師傅學車。上堂一個多小時,石詠莉到附近茶餐廳坐低飲嘢等鄧健泓接。一上車,嘴啖先,拍拖一年,依然激情。

籌備一年的 HiFi碟《聽聽 Sukie》上月中推出,銷量賣贏同期出 HiFi碟的泳兒。

為了這張大碟,當初石詠莉與鄧健泓四出到各唱片公司敲門,結果冇公司有興趣,曾令二人十分氣餒。

「當時係想睇吓有冇公司肯投資,亦好想有人去 support自己,做呢隻碟好辛苦,難做到想過放棄!係佢(鄧健泓)點醒我,要堅持夢想。」石詠莉說。

上月廿九日中午十二時多,鄧健泓載石詠莉到旺角學車。

有男友教路的石詠莉,揸車技術不錯,唔似學神。

知道女友夠鐘學完車,鄧健泓校啱時間接石詠莉,咁細心,故石詠莉一上車即刻嘴佢一啖,冧晒!

自認衰格

冇唱片公司願意冒險,最終石詠莉與鄧健泓加兩個音樂人,集資幾十萬完成出碟夢。由揀歌、傾版權,甚至行電台、巡鋪,二人均一手一腳拍住上。所屬的中國 3D數碼娛樂過去曾幫石詠莉出過兩張 EP,但這張處女大碟,卻由鄧健泓名下公司做發行。

「公司啲同事都有出力,好似幫我約宣傳訪問,老闆有叫我加油,佢俾好大自由度我;支持有好多種,已經好感恩。」

由 Freeze到今日,入行九年的石詠莉表示遇上鄧健泓令她改變不少。

「佢令我更認識自己,唔再太自我保護,睇番以前嘅自己都幾衰格,例如對記者面口唔好,好惡死咁!」

在公在私,鄧健泓對比自己後生十幾年的女友均照顧周到。

「佢有太多身份,付出多到我都唔知點形容!其實大家都係打雜,爭在未掃地吸塵!總之佢好錫我,係一個好肯付出而又負責任嘅男人,可付託終身。」石詠莉開晒口,鄧健泓仲等乜?

鄧健泓除了出錢出力幫女友圓夢外,還帶她四處識新朋友,早前便相約陳志雲晚飯。

由於資金有限,所以唱片封套及內頁靚相均由鄧健泓操刀,知道女友邊個角度最靚,影起來特別稱心。

同期出碟的泳兒,亦是行 HiFi碟路線,結果輸給石詠莉,銷量比她賣得差。

各走各路

石詠莉、陳樂榣及甄詠珊於 06年分別成為變靚 D矯形和整容手術代言人,同年三人簽約一元製作室有限公司, 07年組成女子組合 Freeze加入樂壇,直到 10年甄詠珊與一元製作公司解約, Freeze名存實亡。

石詠莉

仍是蕭定一公司中國 3D數碼娛樂旗下藝人,但卻被投閒置散,今年自資推出 HiFi碟,希望多條出路。

陳樂榣

10年淡出娛樂圈後,於銅鑼灣開設「悠油畫室」開班授徒, 12年與圈外男友結婚,今年做埋阿媽,誕下一女。

甄詠珊

2010年與一元製作公司解約後簽約亞洲電視,之後再簽尚品娛樂,填詞做唱作人。

鍾意就快D Share啦!
Related Posts Plugin for WordPress, Blogger...