掃呢頁CODE去手機

2015年7月9日 星期四

RM齊人唔怕死 [壹週刊 - 1322] RM,Running Man,M1,



韓國綜藝節目《 Running Man》第三年喺香港舉行見面會,風頭最勁係大哥劉在錫(左),身為多個人氣節目嘅王牌主持,放下身段同池錫辰(中)及李光洙(右)扮女人,劉大神真厲害!

日韓到會

RM齊人唔怕死

港府向韓國發出紅色旅遊警示,一班哈韓迷無得去朝聖,不過韓星繼續湧到港!韓國人氣綜藝節目《 Running Man》嘅成員舉行亞洲巡迴見面會,第一站由香港開始,連續三年同香港 fans見面,今年勁在第一次全部成員到齊,名嘴劉在錫首次現身見面會,一出場觀眾嘅尖叫聲,比起見到年輕男團有過之而無不及,七位成員展現合作無間嘅默契,果然係韓國綜藝之王!

現場撕名牌 刺激緊湊

《 Running Man Race Start!》巡迴已經舉行到第三年,上兩年因為成員嘅工作行程,而未能 full team上陣,今年首度以齊人姿態舉行見面會,一眾亞洲嘅 fans梗係開心,尤其是喺節目入面嘅靈魂人物劉在錫終於加入大隊,消息一傳出立即掀起撲飛熱潮, Fans都想入場一睹呢位綜藝一哥嘅風采!見面會分為兩部分,第一部分係同幸運 fans玩遊戲,各位 Fans終於可以同七位成員作近距離接觸。先玩一啲簡單嘅遊戲熱身,好似障礙賽及有口難言,完全難佢哋唔倒,最後進入戲肉,就係節目嘅招牌遊戲——撕名牌!七位主持各自同一位 fans組成一組,並用毛巾綁住各人其中一隻手。 Fans負責撕對手名牌,主持負責防守,親眼見到佢哋玩撕名牌非常刺激緊張,好似睇緊運動比賽,每個人都有自己嘅作戰計劃,李光洙喜歡耍蠱惑招,金鐘國係力量型,而唯一一個女成員宋智孝最多 fans,全場幫佢打氣結果仲贏埋,女仔真係着數啲!

李光洙同金鐘國喺節目入面狗咬狗骨,兩人互撕名牌時有發生,今次現場比併一次俾 fans睇,似乎金鐘國多啲 fans。

Gary表現力豐富,玩有口難言係佢強項,呢個甫士一睇就知係摔角。

上台玩遊戲,其實都係恨一張合照,呢張一次過齊晒 7位成員,滿足晒 fans嘅願望。

《 Running Man》播出五年,而家成為亞洲最受歡迎電視節目之一,七位主持喺見面會尾聲,向觀眾下跪行大禮,答謝觀眾支持。

唱廣東歌 練舞夠誠意

見面會第二部分係表演環節,七位主持瞓身演出,變成演唱會!其實七位主持入面,只有金鐘國、 Gary同 HaHa係歌手,其他四位唔識唱歌跳舞,惟有以誠意搭夠。智孝露出小蠻腰跳 4Minute嘅《 Hot issue》,扭扭吓都算有板有眼。池錫辰一向好鍾意陳奕迅,今次苦練最新歌曲《無條件》,雖然唔算字正腔圓,不過作為外國人唱廣東歌已經係超班。而全晚高潮一定非劉在錫莫屬,佢戴上假髮,著套芥辣黃西裝,唱出佢嘅飲歌《狎鷗亭小混混》,有睇開佢嘅綜藝節目相信唔會覺得陌生,之後再同李光洙池錫辰反串扮女團 Orange Caramel,小紅帽裝加嬌俏舞步真係令 fans拍爛手掌!其實 42歲劉在錫貴為一哥,依然毫不錫身為觀眾帶來娛樂,難怪節目長做長有!

劉在錫嘅 fans年齡層好闊,上至媽媽級,下至 90後少女,搞笑係佢嘅撒手鐧,好似呢個冬菇頭 look再加個心心, fans立即尖叫!

李光洙喺果汁糖廣告形象搞笑,其實練得一身肌肉,露多啲應該有更多 fans!

Gary同智孝喺節目入面玩曖昧,螢幕情侶形象深入民心,今次仲一齊合唱, fans都想佢哋真係拍拖!

金牌司儀 妙語連珠

今次《 Running Man》嘅訪港之旅,其中一個最大看點係劉在錫,果然無令大家失望,一出場嘅氣場已經非常強勁,喺見面會上戴假髮扮女人固然厲害,不過主持功力深厚先係佢嘅賣點!好似喺開騷前舉行記者會,整個記者會就好似係由佢主持一樣,司儀問完一條問題,立即由佢安排邊位成員作答,答完之後仲有 follow up,由於擔心翻譯唔切,仲吩咐成員要答得簡而精,呢啲就係專業!答案短得嚟亦都唔會言之無物,被問到嚟香港想去邊度玩,劉在錫叫成員介紹吓,大家叫佢去 Soho區識女仔,佢鬼馬咁叫大家幫佢保守秘密,惹得全場發笑,連唔識韓文嘅記者都大讚佢好嘢,「國民 MC」果然名不虛傳!

《 Running Man》播出五周年, fans特別訂製生日蛋糕,印有節目入面嘅經典場面,眾主持睇到唔捨得食。

劉在錫喺記者會上講足全場,又識得搞氣氛,兩位後輩金鐘國同李光洙都話拍馬都追唔上。

由於有幾個節目在手,劉在錫工作行程緊密,今次嚟見面會,都只係可以逗留一日,再趕返韓國錄影。

見面會之後,金鐘國、 HaHa同池錫辰留多一日出席活動,可以單手抱起 fans,金鐘國被稱為「能力者」真係當之無愧。

劉在錫當初由搞笑藝人做起,除咗眼鏡個樣好似蚱蜢而被取笑,而家已經被稱為「國民 MC」,喺韓國幾乎無人不知。

鍾意就快D Share啦!