豪語錄
給女人的寫真 羅霖
美魔女並非空口說說，人，真會隨着年齡而魔化的。
由另一位羅林（ J. K. Rowling）講起，請看早期的《哈利波特》，純潔天真可拿來做 bed-time stories，我們的羅霖也講過俾三個仔睡前聽吧，正如她說，本來，出書最應該寫育兒書。
及至後期的《哈利波特》，調子愈來愈殘酷黑暗， Rowling新作，索性轉寫犯罪小說，正如羅霖沒出兒童讀物，初戰書展的是寫真集——媽媽學壞咗？
「不能永遠留在童話世界，不如早些讓他們知道現實。」尤其孩子會明白，媽媽得零蚊贍養費，還要供外國升學，送你去霍格華茲變啲錢出嚟咩？
枕邊故事
關於 bed-time stories還有的是，因為新書緣故，羅霖近日影了很多床照，她自嘲：「像柏床褥廣告。」倒記得她的確拍過。「那時剛當選亞姐。」另一陳年廣告更攞命，與劉坤銘孖公仔「天仙配」 call機，唉 call機，歲月果然是一把殺豬刀。
自嘲僅此而已，這天面對床單，羅霖非常專業，該露則露，穿崩位，「我垂下頭髮遮住便好。」專業得令人心痛。
——如果婚姻沒觸礁，會出寫真集嗎？
「一定不會啦，任何丈夫都唔想老婆俾人哋睇蝕。」
於是，什麼「好趁青春留倩影」，半百之齡輪不到她；亦非什麼為自由，有得揀，她寧願不要這種自由；她甚至不熱衷談保養之道。
「書名《 Timeless》，唔係指凍齡，係指中年人的夢想也可以不受時間限制。以我這年紀，遇過挫折，都企得番起身。
「我相信會有男性讀者，但女性更多，我希望幫到人，書中有些文字表白。」
——寫真集講呢啲，牛頭唔搭馬嘴吧？
羅霖難為情了：「是簡簡單單幾句中英對照，『雨後會有陽光』之類。」
嗯，雨後陽光，著泳裝。
羅霖說，感恩出版社給她很大主權，合約連泳裝也毋須列明，她揀了穿 corset為主。
——但泳裝豈非比內衣更出師有名？至少 sporty啲。
「對未生育過的女仔，三點式沒難度；生育過的，有些有妊娠紋，咁我又冇。
「我自備五套去韓國，拍攝當日很趕，只吃了一塊麵包，見肚皮夠凹，索性影埋。」
咁就出事。「大仔和二仔（十九歲和十七歲）只說：『你清楚自己做緊乜便好。』小兒子（九歲）聽聞媽媽寫書本很興奮，但睇到泳裝相就話唔好、要遮眼；我說：『媽媽同你去游水都咁著啦。』原來，他怪場合唔啱，那是在室內拍攝的。他在似懂非懂之間。
「咁，首爾又冇沙灘……」
失控
首爾現實冇沙灘，現實豈能盡如人意。
性感是條不歸路，雖然羅霖說，影集尺度在她控制之內，「不覺得委屈，攝影師沒呃我。」但來到宣傳期，愈影愈激。「某些報紙才呃我，叫佢唔好出穿崩相偏要出。 Beyond control，我預咗，起碼惹人注意，做得呢行就係咁。」
——如果說生活逼人，現任兩間公司董事，生活真如此逼人？
「應付自己一個生活，完全唔成問題。但大仔在英國讀書，明年轉去美國更貴，遲些加上二仔，兩人學費一年一百萬，這是現實需要。幕前知名度，可幫到搞生意。」
——因為過慣豪門生活？
「我小康出身，兒子讀基督教學校，也習慣樸素，跟我住，有時住嗰邊（指前夫劉坤銘家），回來說：『原來一家人住細細哋便開心。』在 facebook看到留言，我會流淚。我當然知道他們對父親的感覺，但不能代答。單親家庭已經缺乏安全感，我更加要尊重他們私隱。
「我每晚等細仔睡着後處理工作，然後半夜兩點與英國兒子通完電話才安心，跟住六點又張羅返學，自己只瞓三、四個鐘。」
那麼，輪到談保養之道了……
「從不 keep fit喎，我係飯桶，不吃飽不夠力量。還靠意志力支撐着我，我慶幸尚有些童真，陪細仔去玩過山車，嗌吓當發洩。」
是值得慶幸的，兩名兒子成年，還有孻仔痴纏。有數得計，相距咁大，懷第三胎時，婚姻應該亮起紅燈了。
「的確當時已有問題，我一心追個女。」
——把美麗遺傳給女兒？
「但醫生話生女多數會似爸爸。我冇諗過靠 BB挽救婚姻什麼的，這很傻。懷了孕忙着照 3D，但求五肢健全心滿意足。」
靜觀世音
羅霖脫口說「五肢」而非「四肢」，笑難怪她逢生必男，羅霖的反應竟猶帶害羞。良家婦女，即使拍艷照，也容不下黃色笑話。
據說，羅霖屬觀音相。「我天生不吃牛肉羊肉，當年未信主，媽媽帶我去算命，相士話我晚運會愈來愈好。」
非關宗教，勝在夠勵志。
不只性感，羅霖參加選美亦遲過人。
她幽幽嘆道：「因為我冇諗過入呢行，更冇諗過走唔到。
「廿四歲，我是那屆最老的亞姐，入唔到圍豈不是好瘀？認識 Nel Nel（亞姐顧問張學潤），他教我在截止當晚九點才入紙報名，包冇記者影到。
「我連熒幕初吻也遲，在《真情》（廿年前）和黃智賢是借位；去年《愛尋迷》才與關楚耀，我仲提佢：『咪伸脷呀。』」
羅霖說，在娛樂圈有真朋友，社交界就難講。「離婚之後，有些闊太好虛偽，當我透明。仲好，等我可以認清，我唔怕，慈善活動仍然照去。」
——慈善，畢竟要講錢？
「有力出力啫，我就係咁簡單。」
簡不簡單好呢？拒絕另一間出版社附送的「長期飯票」固然清高，等孩子長大再說，但到時明媒正娶的飯票也怕且錯過了保鮮期吧？自言大仔的同學們會捧她場固然可喜，但面對人家家長不尷尬嗎？
世情很複雜，在有所求而未肯無所不為時，羅霖選擇簡簡單單唔諗咁多。這是她拍寫真集的真實寫照集合。
|
鍾意就快D Share啦！
|
|
|
