我撐硬同性婚姻合法化！
爆壹爆
少女裸照撐同性婚姻
美國上月尾通過同性婚姻合法化。爆哥唔係攣，百分百鍾意女兼多多益善，但身邊有唔少同性戀朋友，反應就好大。其中一個女同性戀者 Colanda，更加開心到孖伴侶影咗輯全裸照，仲貼咗上 fb撐同性婚姻，寫住：「寶貝，我們可以光明正大了……在美國。」雖然重要部位有嘢遮住，但都好噴血吸引眼球。
玩到咁激，爆哥當然第一時間搵佢出嚟吹吓水。 Colanda今年只得十八歲，係一名兼職捽碟 DJ。爆哥問佢點解要裸撐咁激？佢話一向覺得女同性戀性感相好靚，所以上載呢批大膽照片來支持同性婚姻，「希望透過呢輯相，可以表達出同性戀唔係一件壞事，都係一種正常戀愛，同男女關係一樣，係好正常嘅事。」 Colanda又話，其實一早已有計劃同伴侶影一輯大膽照，「因為我覺得女同性戀嘅關係，畫面係好靚嘅，所以我一直都想拍攝一輯咁樣嘅相。而今次美國呢件事，就加速咗呢輯相嘅製作。」不過講到點解要用性感相來撐乜乜乜，爆哥都唔明，但就知呢期相當流行，早排就有港女在 fb晒性感相來拒交警察男友，就連台灣粉塵爆炸，都有香港女護士影性感相來撐傷者，呢個年代後生仔女興呢味嘛，正所謂潮流嘅嘢，我哋啲老鬼識咩呀。
但搞到咁高調，唔怕家人同朋友反對？ Colanda話自己好好彩，家人同朋友都冇反對佢嘅「出櫃」行為。講吓講吓，佢仲開始眼濕濕，好感慨咁話，希望香港社會風氣可以開放啲，能夠容納同性戀者，甚至有朝一日，會將同性婚姻合法化。好，爆哥撐你，人人婚姻愉快，對社會點都係好事。
勝和校長 專心鋪路
早排差人重錘打擊和勝和，唔少大佬輩人物都俾人拉咗。爆哥近日同一名江湖叔父傾開呢單嘢，佢話最無辜嘅，應該係有勝和校長之稱嘅雙鷹青，因為佢呢兩三年已經少理江湖事，不過佢始終係上屆揸數人，名氣大，所以警方都仲係唔放過佢。
聽叔父講，脾氣一向火爆嘅雙鷹青，近年已經收咗火，主力做正行生意，除咗早年喺深圳開茶餐廳外，又殺入錦田一帶搞地產，都叫搵到錢。雖然初期同勝和嘅元朗猛人囝囝有拗撬，但之後大家都傾掂數各有各做，無話搞到黑幫火併咁大鑊。上星期爆哥去錦上路水流田村探朋友時，見到一班人喺度修路，當日太陽鬼咁猛，睇見都辛苦。其中一個神高神大好熟口面，望真啲原來係雙鷹青。堂堂大哥唔通轉行做鋪路工人？唔係，雙鷹青只係喺度監工，指揮班工人做嘢。朋友話沿住條路入去，有兩幢新起嘅村屋，應該係屬於雙鷹青發展嘅。睇嚟佢都係一心一意搵錢，唔再出江湖搞搞震。
沙灘原來有錢執
爆哥上星期二朝早去石澳行吓，點知就遇到一位奇怪老外，他手持一個逾一米長的儀器在沙灘上來回踱步、「掃吓掃吓」，成個科學家咁，究竟搞邊科？問吓先知，原來呢位奇人叫 Simon Cox，英國人，已退休，本從事電纜工程，約兩年前移居香港，與妻子現居於西貢。過着退休生活的 Simon，喜歡郊遊，一星期會有一兩天帶同金屬探測器，到唔同沙灘「淘寶」，佢話「淘寶」喺英國非常普遍，經常有人四處尋找「古董」寶物。
自移居香港後，他持續進行此「興趣」，但依家找到嘅多是硬幣或銅戒指，曾找到最名貴的「寶物」，應是一枚金戒指，及一枚十九世紀清朝生產的錢幣。呢日佢搵唔到古董，但找到約七十蚊嘅「散銀」，但並不介意，仲話如果颱風過後沙灘上會有更多錢，最多可淘到約二三百元「銀仔」。爆哥覺得呢鋪正宗行街都有錢執，各位江湖救急等錢使，都可以考慮吓。
爆哥乜料
金融界撈家，穿梭黑白政商界，朋友遍布旺角至中環，每星期都八到唔同料，同《壹》仔讀者過吓癮！
|
鍾意就快D Share啦！
|
|
|
