娛頭
張文采狠飛 醉酒溝女影裙底 羅鈞滿韓國被扣兩個月
被揶揄七線扮三線的大台藝人羅鈞滿，得新聞部高級索主播張文采不嫌不棄，拍拖四年，女方日前在 fb自爆已經分手，更後悔浪費四年青春。
據知，鍾意搵位抽水搞到一街火頭的羅鈞滿今年二月曾在韓國闖禍，有指他在當地夜蒲醉酒玩出火，得罪社團再鬧上警局，最後無綫要出動律師親飛韓國營救，到四月底才安全返港。未有向女友講出真相的他，五月再被踢爆背正印偷食空姐，張文采唯有斬纜。
追空姐兩度遊韓
入行六年，一直做三打七角色的羅鈞滿，前年為女友張文采和新聞部小花黃紫盈內鬥，突然插嘴力撐，戀情曝光，出位成功，當時他更公開確認視對方為結婚對象。其後參加《星夢傳奇》入到五強，獲余詠珊納為自己友力捧，派做綜藝節目又升呢擔任《勁歌金曲》主持，人氣一度急升。
有機會，但羅鈞滿未有好好珍惜！接連犯交通規例惹官非，又扮代表亂發言，盲撐大台贊成政府不發新電視牌，形象插水。但羅鈞滿未有學乖，今年二月，更在韓國溝女闖禍，搞到被扣超過兩個月。
「今年一月，阿 Moon（羅鈞滿）同嗰個空姐 Sylvia一齊去過韓國玩，到咗二月，佢知對方喺韓國，忍唔住又飛埋過去，之後 Sylvia飛走咗，佢就繼續留低，有晚同朋友出去飲酒，飲大咗就玩到癲晒，仲唔小心惹到當地嘅大佬個女友，個大佬唔高興，要佢賠錢道歉，話如果唔賠錢，就告發佢影女人裙底。
余詠珊營救
「阿 Moon係阿倫帶入明星足球隊，不嬲同班大哥都有偈傾，佢即刻打電話返香港求救撲水，不過都籌唔夠，最後人哋真係做嘢，搞到上警局，阿 Moon唯有搵 Sandy（余詠珊）幫手，公司就搵咗律師同經理人飛去韓國救佢，喺嗰邊搞咗成兩個月先走到。不過阿 Moon返到香港都冇同 Wendy（張文采）交代清楚件事，直到最近偷食斷正， Wendy先知道真相，仲發現佢同樂瞳行得好埋。」知情者說。
愛生事
羅鈞滿性格自以為是，仇口多，更兩度因為交通條例，幾乎一身蟻。
13年 4月
羅鈞滿因違例泊車而被控多條罪名，他否認控罪並到法院應訊，被裁定表面證供成立，同年 11月的審訊中，羅鈞滿成功舉證事發路段為私人路段，最後被判罪名不成立。
14年 3月
羅鈞滿揸車落斜時撞到前面一架的士，將的士推前撞到另一部私家車，造成三車串燒。羅鈞滿在屯門裁判法院被裁定不小心駕駛罪表證成立，裁決當日，卻因的士司機供詞前後矛盾，獲判罪名不成立。
封鎖消息
二月在韓國出事後，未能回港的羅鈞滿唯有同時消失於《勁歌金曲》，明星足球隊的每週操練，亦被迫缺席。
「平時只要唔使開工，阿 Moon都會去踢波，大家冇見佢一排，都有問佢點解喺韓國咁耐唔返，啲人仲笑佢留喺當地整容，直到明星足球隊班大粒好嚴肅咁話如果想阿 Moon冇事，就唔好問咁多，只係話佢喺嗰邊醉酒出咗事。」知情者說。
不想「家醜」外揚，大台對羅鈞滿在外地被扣一事，上下封嘴。
「上層有指令，叫經理人部門嘅同事唔可以對外講呢件事，所以好多人都唔知阿 Moon原來咁大鑊，不過佢喺公司其實都冇乜朋友，同星夢班人亦夾唔埋，好似同鄭俊弘同鄭世豪一齊出活動，阿 Moon會為咗爭靚位批踭，人哋唱多幾句，佢又同監製投訴，所以都冇乜人理佢同知道佢出咗事。」知情者說。
蝴蝶公主
唔介意女尊男卑，同三打七拍拖的張文采，虛度四年，轉眼三張！於珠海學院新聞及傳播畢業後，張文采 08年加入亞視做財經頻道主播， 09年跳槽無綫主持《晚間天氣報告》及《天氣報告》。 13年被指欺壓前主播黃紫盈，令對方於互動新聞台報導南非前總統曼德拉的健康狀況未有好轉時，忽然流淚人前，引起網民熱烈討論，最後黃紫盈鬥輸離開無綫。今年 6月，張文采正式孭正成為《六點半新聞報導》主播，因常穿戴有蝴蝶結圖案的服裝及飾物，被網友稱為「蝴蝶公主」。
前度冇否認
本週一（七月六日）黃昏，羅鈞滿為張文采在 facebook自爆分手，大呻浪費四年青春一事在 instagram留言：「凡事有轉機」隔空補鑊。收工離開電視城時，被問到有關韓國惹禍一事，羅鈞滿也一味苦笑唔回應，之後更踩盡油，以一百八十公里車速速逃。翌日出席活動又終承認分手，不過就口窒窒冇講被撇原因。
至於得悉真相後怒撇男友的張文采，對有關前度在韓國醉酒出事，並未有否認。「多謝關心，你都明白我唔係咁方便回應太多！」之後匆匆收線。
|
鍾意就快D Share啦！
|
|
|
