五十七歲的丘瑞田多年來不停向廉署告發圍標問題，案件提堂前他接受訪問，問他心情如何？他說：「我不入地獄，誰入地獄。」
封面故事
判頭爆圍標集團大鑊：攬住一齊死
上週五，沙田翠湖天價圍標案提堂，前裝修公司判頭丘瑞田被控串謀他人提供賄款取得工程合約，到九龍城裁判法院應訊。一群翠湖小業主早已在法庭外等候，他們為三十多萬元天價維修費積了一肚子氣，看到丘瑞田借機發洩，狠狠地叫：「吸血鬼。」
戴着鴨舌帽及口罩、在友人護送下離開法庭的丘瑞田，一反過往被告速速離開法庭的做法，刻意走到攝影機、相機鏡頭面前，不太流利地說：「從九七開始，全香港小業主被人圍標，小心你哋啲物業。」他從口袋掏出一封信，然後說：「我○七年寫信去廉署，叫佢哋救救香港小業主。」話音未落，恐怕他說錯話的友人急急拉他離開。
過去八年的烏氣，他還未吐完。多年來，雖然他從圍標活動中獲利，但他身邊親友的物業已成圍標黨的獵物，驅使他不停狀告廉署，「我不入地獄，誰入地獄。」他深信，只有圍標集團成員挺身舉報，才能有足夠證據將不法分子繩之於法，更不惜付出代價，丘瑞田說：「最多攬住一齊死！」
兩個月後，丘瑞田滿五十八歲，兩名子女早已出身，原本可以展開他遨遊大陸的退休之旅。他說很喜愛到大陸遊覽，「九寨溝真係好靚。」不過，這次他向廉署告發圍標集團，本人也被檢控，他的退休旅行大計隨時押後數年。
丘瑞田被控五項串謀向代理人提供利益罪，多個涉案人物曝光，包括工程分判商鍾偉強、香島建築有限公司董事楊永燊、黃潘建築師事務所負責人黃志光，涉嫌提供賄款給翠湖花園業主立案法團主席黎國樑、新昌管理有限公司董事總經理樊卓雄，及翠湖花園場地經理許鈞碧，以取得顧問及工程合約，涉款分別高達二千六百萬元、一千五百萬元及二百六十萬元。
維修老鼠
圍標新聞時有所聞，但能將集團核心成員送上法庭的案件少之又少，所以丘瑞田涉及的案件分外轟動。四月份，記者跟進翠湖花園天價圍標新聞，透過一名小業主得悉一位熟知圍標內情的業界人士。五月底第一次接觸，雙方約在一間酒樓用膳，他自我介紹叫「強哥」，甫見面「強哥」便滔滔不絕講述圍標黨如何策劃行動。酒樓喧嘩聲浪大，記者要側身才能仔細聽到他的揭秘，冷不防他說了一句：「傾圍標時都會搵啲嘈吵嘅地方。」原來，人多耳雜的地方，才是最安全的傾談地方。
七月一日記者跟他再見面，這次不選嘈吵地方，因為酒樓食肆早已逼爆。換來一個寧靜的環境，假名「強哥」也變成有名有姓的丘瑞田。田哥不煙不酒，說話不徐不疾，聲線放大了，沒有半句粗言，內容卻令人動魄驚心。
自稱「維修界老鼠」的丘瑞田，在行內打滾二十年，他接到工程後負責拉線，外判給其他人處理，像老鼠般在業內「捐窿捐罅」。經歷跟不少中年香港人相似，小學未畢業的他做過製衣，又到過大陸做生意，後來經營不太順利，九五年有朋友找他一起入行做裝修，命運引領一個中年人展開新的事業，同時見證這行業變得愈來愈貪婪。
「九幾年已聽到好多圍標，但我未接觸到圍標高層。」田哥說：「以前冇乜人嘈，因為啲數目細，（每戶）五、六萬元；豪宅嗰啲唔好講啦，總之知道啲住客嘅承受能力，煲到貼近晒價錢（維修費用）。」
人在江湖，圍標集團終於找上他。○四年，有業內人士邀請他幫忙「做戲子」，他拿着一間不認識的顧問公司咭片，代表公司跟業主立案法團成員開會，商討一個大維修項目。開會前，有人向他講解他要扮演的角色，「佢問東你答西就得，明知都唔中，唔會由我代表嘅公司中標，你冇所謂，講錯又得。」他稱作假到如此地步，做完臨記後，忍不住向廉署告發，「有個姓葉嘅見咗我幾次，話報咗俾上面，隔咗三四個禮拜，佢話唔好意思，上面話唔做呀。」
「老圍」揭秘
「救救業主」
隨後幾年，他也斷斷續續向廉署舉報另一些圍標行為，○七年一月他去信廉署，也就是他在法庭外展示的那封信，信中寫道：「香港的大廈維修，圍標問題非常嚴重，百分百有人圍標。」手寫的信件，字體不算工整，內容也有點凌亂，礙於信件內容涉及個別人士及物業維修，本刊未能詳細交代，但信末最後一句「救救香港的小業主。」看出寫信者的着緊程度。
不過，那封信未為事態帶來任何突破，「我已經揭發到心灰意冷，諗住唔再去揭發。」他又繼續在圍標集團擔任「老鼠」，從中獲利，直至一三年看到民主黨總幹事林卓廷，以廉署前調查主任的身份在電台講述圍標問題。丘瑞田找到一線曙光，他繼續游走圍標黨搵食，同時搜集證據向廉署打小報告。
讀到這裡，或許奇怪為何田哥一邊在圍標集團賺錢，另一邊廂卻要生劏這隻生金蛋的鵝？「我講你都唔信㗎，啲人咪鬧我蠢，有錢都唔搵，咁樣去搞禍佢。」他說：「我唔知咩信念，諗住呢啲集團你唔消滅咗佢，香港嘅市民會好痛苦咁生活，好似翠湖個個都喺度嗌救命，富嘉個個都喺度嗌救命，好似何文田萬基大廈，通通都喺度嗌救命。」
事實上，不少親戚遇上圍標疑難曾向他求救，「我接觸呢啲大維修太多，包括我親戚原來住喺富嘉花園嘅單位，佢話：『嘩，咁貴嘅，你做呢行應該知道』，我話無辦法。」親戚受累，終於令他立定心腸向圍標集團宣戰。
他坦言早有心理準備承擔法律責任，「最多大家同歸於盡，有咩大不了，做人最多係死，同歸於盡，一齊去死，我仲要驚啲乜？最多坐監。」
要居民通過維修工程，圍標集團軟硬兼施。有居民就在區內掛橫額，聲稱維修後樓價升值，呼籲支持維修計劃（左下圖）。帶頭反對的居民，收到恐嚇信叫他們不要出頭（右下圖）。
好人難做
轉眼間入行二十年，田哥看到業內如此不公平的情況，有否想過開設一間良心公司改變現狀？「亦都有人開過，冇用啦。」他指圍標集團對業界掌控於手中，一項工程可以控制十間公司入標，也可以令所有公司不入標。「有個深水埗議員話登埋廣告招標，一張標書都收唔到。」
他曾見過有工程公司以良心低價成功搶到一單停車場維修工程，但遇到重重阻撓，「物業管理都玩殘你，你約晒啲伙記，出埋通告話要整停車場。佢（管理處）話得呀冇問題，到時我嗌晒啲車走，你出通告就得。（工程開始）到時一架車都唔走，你嗌晒啲伙記喺度，真係睇住喊呀。」這個圍標遊戲，只有局內人才看得透，「梗係啦，人哋個物業管理煲咗咁耐，俾你扠禍咗，整都整死你啦，掉番轉頭係你都會咁做啦。」要在這行搵食，「寧願扮唔出聲，如果人哋貪你唔貪，人哋咪唔預你囉。」
業界黑幕
曾蔭權政府二○一二年正式推行強制驗樓及驗窗計劃，成為圍標集團眼中的大茶飯，問題越趨嚴重。樓齡三十年或以上的樓宇，須安排合資格人士檢樓及進行所需的訂明修葺工程。很多二十多年樓齡的屋苑，也推動一些樓宇改善工程。香港屋苑大多是數百戶，以翠湖為例，六座共八百四十戶，維修費以千萬元計，是建築商、顧問公司及黑社會的肥豬肉。
一單大維修的圍標工程，首先要由管理公司開始。管理公司派員檢查屋苑時，會向法團提出大廈有需要進行的維修項目，有時會誇大，「呢座嘢都十幾年，都要搵人整吓喇，如果唔係啲嘢跌落嚟責死人都唔知點算。」管理公司已跟業主立案法團溝通，雙方早有默契。他們會積極游說業主，「整靚啲，第日賣出去都值租啲啦，唔好睇幾十萬，整靚啲升值嘛，使得幾多錢，你住二十幾年，攤開每年即係幾多錢？」
《建築物管理條例》規定，只要有一成業主出席，法團便能召開會議，出席者之中，只須過半業權份數即可通過議案。當少數出席者通過大維修議案，其他業主想推翻也太遲。
合謀定價
維修工程落實後，下一步就是找顧問公司估價，「香港做顧問公司來來去去三十幾間，大部分都係圍標集團嘅人，有啲甚至掛名做老細，最叻自己開一間，老婆開一間，都唔犯法。」法團登報章廣告公開招標，營造高透明度假象。「根本係全部自己攞標書返嚟填，佢哋（圍標黨）衡量嗰區人嘅承受能力，例如土瓜灣、荃灣，就會好貼近市價。」所有參與大茶飯的顧問公司均配合角色，填上早經安排的入標金額，「例如：一個三千、一個四千、一個五千加上去，你梗係揀間最平啦，其實已經係好貴。
「佢哋啲標書，搵人上去攞晒返嚟，自己填完交番去，搵幾個人孭，有啲一個人攞個背包孭住幾份。若果係下晝六點鐘截標，（交標書者）四點幾落一份，五點幾又落一份，戴頂帽又落一份，都分唔到邊個真假，啲物業管理公司已經知道晒你哋搞乜嘢，幫埋你添。」不是「自己人」的標書會被丟掉，不會出現在業主揀選的名冊之上。「（圍標黨）佢第二日搵班人上去同呢個老細講，俾番封利是你，老闆，拍硬檔，我哋煲咗好耐喇，整番封利是，唔好意思，下一單先預埋你。」
澳門分贓
顧問公司落實後，所有有份參與圍標的成員，包括管理公司、法團代表、顧問公司、承建商等一齊開會，決定「落袋」金額。不同單位獲派的數目視乎操控整場圍標局的能力，「如果聯繫到物業管理、主席之類，可以多啲；如果我哋（老鼠）有能力，要求多幾隻都得，一隻都得。」
所謂「一隻」，其實代表百分之一，「（法團）主席話要『三隻』、『五隻』，即係一千萬俾三十萬，或者一千萬俾五十萬。」派款額按工程總數計，例如工程本身開支要一億元，圍標黨抽水五千萬元的話，工程總成本會提高至一億五千萬，內定中標的建築公司就以一億五千萬元入標。程序跟挑選顧問公司相若，其他入標的建築公司，都是已夾定的友好公司，不會中標。
不知情的小業主們，無端端額外攤分被強加的五千萬元，建築公司收到維修費後，會交給圍標黨。「最叻過澳門收錢，一係就存入深圳親戚戶口，你都冇得查。」田哥說：「澳門你攞住五六百萬咁過去你都冇問題，俾咗佢咪由佢自己搞掂，你搞掂佢喇，你自己分晒佢喇。」有個別人士選擇收取籌碼，「有啲委員主席怕死到手騰腳震，呢啲俾（籌碼）你玩啦，咁你自己搞掂佢，你點玩自己嘅事，你鍾意就換錢，鍾意賭就賭。」但中間人也會走數，田哥也曾被走數，「唔會有白紙黑字，對方唔俾錢，仲會大番你轉頭：『去報警啦。』」
廉署未起訴丘瑞田前，翠湖花園業主已四出投訴抗議天價維修費。早於去年六月，新昌管理曾四次發出通告澄清事件，強調全程有業主參與招標。直至今年四月十日公布第二把交椅、董事總經理樊卓雄被廉署拘捕後，集團才改變態度，表示成立特別委員會審閱招標程序，由四名獨立非執行董事負責，包括簡福飴、葉澍堃、黃燦光及俞漢度。但至今近三個月，公司未有通告公布委員會工作最新進展。
|
鍾意就快D Share啦！
|
|
|
