同你吟一吟
孖猷君溝女 放棄法拉 薛世恒追國產女
早前賭王四房孻仔何猷君被爆同內地大佢六年嘅超模奚夢瑤拍拖，仲浪漫到喺上海阿媽四太嘅商廈物業 LED外牆，以巨型心心投射示愛。
嗱，八珍聽聞呢啲其實係猷君參加內地真人騷《愛的時差》嘅溝女橋段，唔只何公子，陳法拉前夫， Neway大公子薛世恒都係呢個溝女真人騷嘅一分子。
據聞 40歲嘅薛公子喺真人騷被編入「中坑組」， 22歲嘅猷君就梗係「鮮肉組」。雖然兩個無正面交鋒，但話晒都係香港代表，溝女成績點都有比較。猷君追超模，薛公子就溝內地演員馬蘇。為咗得手，有劇組爆薛公子唔止唱歌，教滑雪冧女，仲學埋韓神劇《來自星星的你》一幕男女主角瞓喺滑雪場浪漫談情。唔知呢啲招數係咪當年追華姐法拉必勝法？
呢個真人騷十二月尾出街，雖然結局保密，但睇個勢，猷君溝女招數似乎掂過薛公子。
撰文：八珍
攝影：李玄、蕭敬漁
來源 source: http://hk.next.nextmedia.com
|
鍾意就快D Share啦！
|
|
|