憑《溏心 3》人氣勁，唐文龍日前在餐廳跟朋友慶祝生日，即被食客要求合照，他有求必應，影完相更會留低傾偈，好得女粉心。
探熱針
《溏心 3》爆肌型佬突圍唐文龍 facebook溝到女
在《溏心風暴 3》做型佬教授惹來一段孽緣的唐文龍，成為劇中唯一一個受歡迎角色，網民 like爆，演藝事業再有起色，去年 12月跟好友劉永健合資的日本餐廳，唔夠一年又有錢賺，現正物色新鋪開分店。不過事業行大運，愛情就暫時零分。原來唐文龍跟拍拖七年圈外女友分手後，經 facebook識到女朋友，二人拍拖一年又告分開：「我覺得自己做緊 95後嘅事。」
搵敏之老公擺和頭酒
今年四十八歲的唐文龍，在《溏心風暴 3》跟陳敏之有唔少火辣床戲，被網民洗版讚入型入格。他說幸好當時沒有女朋友，不過知道拍檔陳敏之老公「冇眼睇」兩人的床上戲，他笑言要擺「和頭酒」氹人哋老公。
「大家睇呢場戲以為拍得好容易，我哋由夜晚十點開始拍到第二朝五點，拍咗七個鐘，冷氣又凍，拍完一個鏡頭，就要用毛巾披身。」他說。
蘭桂坊 chok識女仔
○九年返內地發展決定跟拍拖七年的圈外女友分手，向來是宅男的唐文龍，就算回歸香港三年多，識女朋友途徑也不多，拍拖一年的前度也是在 facebook認識。
「坦白講，我係宅男，冇乜渠道識女仔，唔通真係坐喺蘭桂坊 chok住識咩？兩年前朋友叫我玩 facebook同 instagram儲 fans，我同 facebook一個女仔幾啱傾，係咪靚女就見仁見智，但最重要係大家性格同價值觀都相似，拍拖一年左右，因為有啲意見不合，好自然分開，不過大家再見亦是朋友。」他說。
網上識朋友，好多人指他大膽，不過唐文龍覺得只是做緊九五後的平常事：「其實喺網上識人，我係好陌生，不過我哋呢啲年紀，都係要做番傳統嘢，約出嚟見面，雙方了解先開始拍拖。」
日本餐廳再開分店
回歸香港三年，事業穩步上揚，就連和好友劉永健合份投資的日本餐廳在開業一年後也有錢賺。
「同朋友傾偈，大家都話上年巿道唔算好，我哋好好彩餐廳生意唔錯，唔係賺好多，大概有四百萬，足夠開分店，我哋之前喺銅鑼灣同鰂魚涌都搵過地方，不過租金好貴，而家仲未揀啱，希望租金唔好再升，可能農曆年後會搵到。」
被女飛
在紐約 Fashion Institute of Technology攻讀 FIT女裝設計學士畢業的唐文龍，有身形有學識，不過幾乎每次拍拖都是被飛多，但再見亦是朋友，有些更會找他傾心事。
撰文、攝影：娛樂組
|
鍾意就快D Share啦！
|
|
|