坦白講
來到大阪的瀋陽小鮮肉
近年日本被不少港人視為第二個家，除了享受當地美食、景點及文化，當地人對服務的堅持都是原因之一。
更有不少港人期望到日本工作，無懼「過勞死」及職場欺凌。現實，又是怎樣的一回事？
今年二十二歲的劉曉琳，本身是中國人，小學三年級從瀋陽來到日本，一直在神戶居住，畢業後留在當地，現於一間大阪居酒屋擔任店長，更被老闆封為「大阪小鮮肉」，專門接待遊客生意。
每日工作十多小時的曉琳，忙於為分店開張做準備，雖然訪問已用上他唯一半小時的休息時間，但他一臉靦覥地說：「不介意。」已視日本為「家」，但來自內地的他坦言，
對日本人太有禮貌仍很不習慣：「我比較喜歡大家都會說心裡的話。」
我自細就鍾意煮嘢食，想搵番呢一方面工作，最後嚟到呢間專食雞料理嘅鋪頭，每日由早上八點喺屋企出發，踩五分鐘單車到居酒屋做準備，十一點營業，之後休息連食飯時間最多三十分鐘。下午兩點半又要準備晚市，做到十點，收鋪後清潔，返到屋企已十二點幾。你問我辛唔辛苦？我覺得，就算再辛苦都值得嘅。老咗、年紀大嘅話，你想辛苦都無咁多體力。有唔少朋友都同我講，依家中國搵錢易，點解唔返去，我就覺得我年紀仲細，需要嘅係技術，而唔係賺錢，依家我嘅目標係想修練技術。
我性格比較開朗，一直以嚟日本朋友都對我好好，唔會因為我嘅出身而對我唔同。但令我最唔慣嘅，係日本人太有禮貌，所以有時會覺得好悶。日本人講乜嘢開頭都會講對不起、對不起，大家想講嘅嘢都會收埋喺心裡面，所以都唔知對方諗緊咩。
香港人好熱情，每次嚟到都會請我食水果，日本人就好少會咁做。我都知道香港樓價好高，唔少人都嚟日本買樓，當地人都唔太介意嘅。但我買樓嘅話，就會選擇喺神戶，神戶環境好好。至於大阪"…人太多了。
聽過不少香港的朋友都提及過中港矛盾，老實講，日本人係唔知道中國同香港係分別兩個唔同嘅地方，都以為係一齊。到咗最近先開始知台灣係台灣，中國係中國，依家先啱啱開始接受。我都聽講過中國遊客消費能力好高，但係我喺鐵板燒做嘢時，香港人嚟吃飯，都會食到十幾萬（日圓）。如果中國人"…我就覺得比較小器囉！
撰文:梁延宇
攝影:林志謙
|
鍾意就快D Share啦！
|
|
|