誠哥「上課」當日戴着的手錶，已經唔係 Citizen。（李嘉誠基金會微博圖片）
中環人語
李嘉誠換「高科技」手錶？
上星期李嘉誠基金會喺微博發文，指長和主席李嘉誠上咗特別的一課。嗱，呢課真係唔嘢小，先講師資，係加州伯克萊大學教授杜德納親自喺香港單對單教超人。課題，係利用 3D打印的 Lego展示 DNA剪輯過程。超人話，最高興係可以攞來送俾孫仔。
小宗老友眼利，超人手上戴着嘅手錶，已經唔係今年中戴住，售價六千元嘅黑色 Citizen手錶。睇錶面設計，錶界老行尊話，疑似係售價兩萬元嘅瑞士 Rado。據講品牌係 sell高科技陶瓷材質，仲話集合「堅硬、耐熱、防腐蝕同唔生銹」嘅優點於一身。
話說幾十年前超人係戴五十蚊嘅日本精工電子錶，一直愛不釋手。近年戴 Citizen，貪佢可以太陽能充電同防水，方便打波游水，仲會撥快半粒鐘。換上高科技手錶，亦好配合佢嘅新嗜好，佢私人投資旗艦維港投資已入股雷蛇，又曾投資 Facebook、 Skype及「植物牛肉」。八十九歲嘅誠哥，「與時並進」，服！
不老之謎
上星期本刊同事影到大台新聞之花黃德如，喺中環同友人 high tea。四十三歲嘅黃德如闊別熒幕多年，依然無走樣。不過同事睇漏眼，當日同佢 high tea嘅，正係迪生創建（ 113）主席潘迪生（ Dickson）老婆余桂珠（ Pearl）。
如果話黃德如無走樣，咁潘太就更加可以叫「凍齡」，皮膚白裡透紅，佢嘅身體原來係由黃德如調理。係人都知黃德如老公係呼吸系統專科醫生梁宗存，而黃德如二千年亦已去咗港大中醫學院修讀，依家已經係註冊中醫。小宗勸告兩位下次唔好食 tea，研究吓出本《不老傳說》好過咯。
陳家強猛料老婆
財經事務及庫務局前局長陳家強，半年前先講本港樓市風險大，點知上個月以三千幾萬購入中半山珀苑一個千四呎單位連兩個車位，結果被人話前後矛盾。人哋背後有高人教路，話晒傻強老婆胡翠萍（ Eva Chan）並唔傻，佢曾係投行摩根士丹利高層，後來轉做瑞士寶盛（ Julius Baer）高級執行董事，據聞湊內地大客有一手，連瑞士高層都曾飛來港同佢交流。
翻查傻強資料，佢只有一間已解散的私人公司及在一間上市公司（香港按揭證券有限公司）任董事，同老婆持有承德山莊一單位連車位，但已蝕讓，而 Eva則以個人名義持有玫瑰新邨一個單位連車位，相信係兩人嘅愛巢。
被貼街招尋人
臨近年尾，金融圈有唔少人提早收爐放長假，但今年就算出埠，好多人都唔敢關掉手機，就好似結好（ 64）老闆佐治洪漢文，上星期北上失聯咗一陣間，同系兩間公司好似被人斬倉跌到一仆一碌，直到搵到佢股價至升番啲，口痕友話市場積存太多驚弓之鳥，只要有輕微風吹草動，一樣可以嚇死人。
早兩日小宗行經銅鑼灣，睇見有尋人啟事貼滿吉鋪門口（其實幾 old school），發現主角係幾間上市公司嘅話事人楊俊偉，內容指佢係「老千騙子」。呢單嘢原來在圈內都有好多人留意到，亦嘗試搵呢個楊生，不過咁蹺又真係搵唔到，加上佢老兄呢排接連辭去 E-Kong（ 524）及華融投資（ 2277）嘅執董職位，令成件事更加耐人尋味。
查實楊俊偉除咗搞幾間上市公司，佢仲係一個打機達人，經常打機打到三更半夜，打過嘅遊戲多不勝數，曾經成為手機遊戲《皇室戰爭》嘅世界冠軍。佢曾經同朋友講過，為咗加快升呢，不時科水買武器，閒閒哋幾十萬，甚至為打得更有策略，搵公司同事幫忙搜集資料，真係打得相當認真。
李小加花紅實爆升
港交所（ 388）上個禮拜收市後公布諮詢總結，落實容許新經濟公司，可以喺有條件下，以同股不同權方式來港上市，亦准許有關公司來港作第二上市，總裁李小加形容這是港交所 93年批准 H股上市後最大嘅改革，最快明年下半年實行。
老實講，小加總裁所言非虛，除咗港交所係大贏家外，相信佢自己亦立咗大功，事關今次說服到大老爺證監會首肯讓步，據聞小加總裁事前聯同港府落咗好多嘴頭才得以成事。
唔講或者大家唔覺，單計一隻阿里巴巴，每日喺花旗嘅成交金額都過百億港元，以小加總裁同馬雲關係，帶阿里嚟香港第二上市應冇難度，到時俾佢搶到「巴巴」一半成交，已經發過豬頭，因此外界估計明年小加總裁份花紅，肯肯定勁升咯。
撰文:宗菁華
|
鍾意就快D Share啦！
|
|
|