港姐泳衣要經佢過目（真實對白）
探熱針
陳志雲新節目爆大台秘聞，六嬸生前落港姐限奶令
大台早前忽然落限奶令，令一眾咪神被迫戒奶。不過日前陳志雲為網上電視主持雜誌式節目《大開眼界》時，爆出「六嬸」方逸華生前已親自下旨「限奶令」，針對目標是港姐佳麗。六嬸更插手管埋泳衣設計，為港姐事業線把關到底。在她掌權期間，出爐的葉翠翠、曹敏莉及徐子珊等，都走唔甩一件頭泳衣見人。
六嬸睇唔過眼
志雲大師既是復活亞視打頭陣猛將，主持《百萬富翁》，同時亦在網上「 OpenSky.tv」開節目《大開眼界》，孖甄詠蓓、音樂人林家謙大講電視風雲。曾是 TVB高層的他，在新節目爆唔少大台秘聞。其中一集關於大台「限奶令」，原來宅男福利節目《 3日 2夜》誕生前，早在「六嬸」方逸華生前掌政年代，她已因睇唔過眼港姐泳衣，內部下旨要港姐「限奶」。
泳衣加布防漏奶
陳志雲在節目說：「我印象最深係港姐泳衣，方姐當日好投入去傾呢啲製作時，對呢點幾堅持，佢會話：『點解啲衫整成咁，使唔使咁細件呀！依家睇女仔乜嘢呢？』佢話使唔使睇到連罅都睇埋，唔啱喎！咁最後梗係有轉到啲衫（泳衣），加多咗布。」
六嬸管埋泳裝設計
為嚴防一眾港姐佳麗變大奶奶，愈見暴露，六嬸更索性插手管埋港姐服裝設計，隻手遮胸。陳志雲續說：「後期有段時間啲設計，直情要俾方姐過目，咁佢對呢方面睇法都好前衞嘅。」方逸華於二○○○年正式掌權 TVB，至一二年才全身而退，掌政十二年期間，港姐泳衣在六嬸限奶令下，就算保留三點式，事業線能見度低，甚至出現冇睇頭的一件頭。
港姐只代表 TVB？
事後再問陳志雲，六嬸年代已經「暗啞底」存在「限奶令」，他說：「如果用呢個名詞，我可以話係有嘅！因為唔好睇到呢個係賣弄胴體嘅節目，佢覺得唔應該咁樣表達，港姐係講求美貌與智慧並重嘅選美，雖然講真 TVB選出嚟，其實都只係 TVB小姐，不過香港人覺得已經係代表咗係香港小姐，選完又會俾旅發局或其他部門邀請做代表去宣傳香港，咁選美就要有一定嘅格調，方姐要求係啱嘅。之後唔只服裝，連港姐布景設計都要經佢過目。」
志雲大師預測王浩信
陳志雲在《大開眼界》亦提到在新加坡先拔頭籌當視帝的王浩信，但他說：「啱啱攞咗星和視帝嘅佢，以我以往經驗同主觀感覺，星和攞完，香港就唔攞。咁多年台慶係唔會改期，但今年改咗去一月廿一日，因為有《溏心 3》出，最尾一集係一月十九日。」
錄影該集節目時，《溏心 3》未出街，但志雲大師竟然開口中。「除非《溏心 3》掀唔起熱潮，收視極低，否則最近觀眾一套劇（對台慶頒獎禮投票有着數），一投票係咪最記得嗰套。」如今台慶劇《溏心 3》收視差強人意，唔知志雲大師會唔會改變睇法，覺得王浩信仲有機呢？
撰文、攝影：娛樂組
|
鍾意就快D Share啦！
|
|
|