阿聰除咗做過採主同財政司長政治助理，原來仲攞過獎學金，去牛津大學路透新聞學院擔任訪問學人。
八卦陣
薯片叔叔前「幕僚」做媒體顧問
今年特首選戰，曾俊華嘅前政治助理羅永聰為「薯片叔叔」贏盡民意，令佢聲名大噪，就連林鄭都點名話如果佢當選，「不如請阿聰過嚟我團隊。」不過曾俊華敗選後，阿聰就冇加入政府喇。佢休養生息一段時間，早幾日《壹》仔撞見佢，佢開咗兩間顧問公司，連本地媒體都搵佢幫手添。
兩個月前，阿聰已經獲「前任行政長官及政治委任官員離職後工作諮詢委員會」批准，開設兩間顧問公司，但因為佢做過政治助理，開公司都幾多限制㗎，例如唔可以參與競投財政司司長辦公室及其管轄多個政府部門負責嘅合約，亦唔可以提供相關嘅顧問服務。
阿聰同《壹》仔講，本地媒體《端傳媒》已經請咗佢嘅團隊做顧問，為《端》嘅營運模式提供意見。至於近排《壹》仔賣盤一波三折，曾經係《明報》採主嘅阿聰就話有人願意投資已經係難得嘅事。
佢認為：「無論嗰個人投資目的係想搞媒體，或者純粹個人嗜好都好，去維持一啲媒體能夠有資源繼續營運落去，本身對個行業嚟講係件好事。」又強調投資者應了解編輯自主同獨立，先對媒體係好事，「俾編輯部話事，唔係老闆話事。」
張翔候任港大校長各方憂慮
港大校委會上星期五，正式任命美籍華裔科學家張翔成為候任校長，接替下個月離任嘅馬斐森，係首任大陸出生同接受教育嘅港大校長。外界一直關注佢嘅背景會唔會令港大「赤化」，亦質疑佢缺乏管理經驗。張翔獲任命後，反駁有報導指佢建議港大應該向中國教育部尋求研究經費，話唔只中國大陸，港大都應該同歐美大學合作。
張翔獲港大任命之前，分別見過港大師生同校友，唔少人都表示，見得一個鐘，好難對佢有深入了解。例如本身係校友嘅學聯前秘書長周永康話，張翔答問題時採取「較安全嘅位置」，回應政治敏感問題時輕描淡寫，冇表達明確睇法。而張翔回應港獨問題時，只強調校園討論港獨需要受法律規管。
港大今次安排喺十二月搞諮詢會，正值學生要考試同教職員要改卷，不過有港大中人形容，今次諮詢會相比四年前馬斐森嗰陣，多咗學生參加，又認為馬斐森獲委任時，校內外氛圍冇咁政治化，亦唔特別關注港大校長人選。呢位候任校長係咪能夠捍衞港大學術同言論自由，似乎需要時間證明
石永泰舊事重提直認「法治膠」
大律師公會前主席石永泰早前喺雙學三子被判囚後，話佢哋「求仁得仁」，又撐上訴庭判辭只係「比較情緒化咗少少」。該言論一出，即被民主派鬧佢為人涼薄。上星期六佢喺一個法治論壇上，突然重提舊事，仲直認係「法治膠」。
石永泰演講時，引用專欄作家「添馬男」提過：「香港社會有批精英一直盲目信任法庭判決，認為社會不應批評法官判決，只要法院判了，大家就收聲，這種人叫『法治膠』。」
然後佢就話：「咁樣我就對號入座……話人哋唔好批評法院，其實我之前都係咁講，所以我係一如以往地『膠』！」雖然自認法治膠，但佢強調大家唔同意判辭內容，覺得法官係咪比較保守，大可以攞出嚟講；又舉例話上級法院法官經常會提下級法院法官犯咗咩錯。
只不過，石永泰認為「律師同法官被共產黨收編」呢啲講法，或者內地媒體對香港外籍法官「義和團式」嘅批判，都會影響將來有意加入法律體制嘅人，「原來做咗官會俾人咁樣（鬧），唔單止係判斷你所講嘅嘢，係對啲官，或者對個制度嘅人格謀殺。」
鄭泳舜備戰前高官輪流谷人氣
立法會補選於下年三月舉行，預料民建聯深水埗區議員鄭泳舜（ Vincent）將出戰九龍西，近排不斷搵嚟重量級人馬，包括財經事務及庫務局前局長陳家強、食衞局前局長高永文等人，輪流幫佢拍片反拉布兼造勢谷人氣。
陳家強接受 Vincent訪問話做咗局長十年，頭五年立法會保持秩序，例如財政預算案討論連表決，唔使兩日就通過，但當拉布之風興起之後就慘喇，每年都受拉布之苦，例如二○一四年預算案到五月底都未通過，令政府政策布局大受影響。
今次成功修改議事規則，陳家強相信立法會主席權力更明確，拉布情況會「有少少改善」，但都擔心非建制議員仲有大把空間繼續拉布。 Vincent都唱雙簧批評非建制議員喺修改議規後，仲繼續抹黑同誤導公眾，必須以正視聽咁話喎。
高永文就同 Vincent到公園拍片，力數因為拉布令醫委會條例改革同《私營骨灰安置所條例》拉倒，相信議會將來會運行得更好。至於政制及內地事務局前局長譚志源同保安局前局長黎棟國，都錄音支持反拉布。黎棟國仲自問自答：「邊個係受害者？係市民。」 Vincent獲咁多位建制重量級人馬拱照，民主派真係要諗計先得。
撰文:巫不言
|
鍾意就快D Share啦！
|
|
|