探熱針
鄰居長期滋擾大肚葉翠翠報警：搞到我有焦慮症
二月初，懷有五個月身孕的葉翠翠忍唔住在 Facebook發火，大爆過去一年遭樓上鄰居噪音滋擾，最初找管理員幫忙傳話，以為對方會顧及大肚婆和小孩，停止清早發出噪音，不過對方未見改善兼變本加厲，投訴無門，她惟有報警求助：「呢件事搞到我有焦慮症。」
愈佗愈瘦
近年備受鄰居噪音滋擾的葉翠翠，由最初啞忍希望以和為貴，到近日忍無可忍要報警求助，有五個月身孕的她，更因事件未能解決，情緒低落，這個月不單未有增磅，反而輕了數磅。
上週四（三月一日）下午五時許，佗住五個月肚的葉翠翠揸車到屋企附近超市入貨，對於報警求助一事，她承認：「其實呢件事已經係年幾前開始，管理員一直盡力幫我同佢哋溝通，但最後鄰居反指俾我騷擾，管理員同我講：『無辦法喇葉小姐，因為樓上都叫你唔好再騷擾佢哋，都無嘢再幫到你。』我唔想再煩其他人，自己又頂唔順，惟有報警。我都有搵律師問意見，亦都有人叫我搵環保署幫手，但因為自己有咗 BB，同埋之前跟管理員搵過樓上鄰居商量，佢哋唔認嗰段時間有人發出噪音，到警察上去同佢哋溝通，佢哋又承認嗰段時間有人喺屋企做緊嘢，所以搞到我好混亂。」
警方出告票
報警求助後，她指只要找到一個第三方證人，證明受噪音滋擾，警方便可以向對方發出告票。這年多來一家人受到困擾，她愈說愈激動，忍着淚表示：「其實報警之後，朝早都係繼續有發出聲浪，小朋友無辦法再瞓覺，一味喊，因為我情緒唔係好穩定，佢喺度喊，工人又放咗假，老公又唔喺屋企，搞到我情緒更加唔穩定，仲試過攬住小朋友一齊喊。老公問使唔使請假照顧我，真係唔知樓上單位要精神虐待我哋一家到咩時候？」
搬屋有心無力
葉翠翠一度有意搬屋解決問題，但實在有心無力，她說：「我有諗過搬屋，但係而家就嚟生，生完湊住兩個小朋友，唔通執幾件衫去租酒店，想搬又搬唔到，對方又唔認發出噪音，可以點做？」
事情一直未獲解決，她開始出現失眠，更懷疑自己患有焦慮症：「我同老公講，發現自己好似有少少焦慮症，好似咩都驚，自己一直留意住情況，好快就會有兩個小朋友，如果兩個小朋友八點鐘一齊被嘈醒，到時應該點做，我想求吓樓上高抬貴手，體諒樓下有個大肚婆，同埋有個初生嬰兒。」
撰文、攝影：娛樂組
|
鍾意就快D Share啦！
|
|
|