近日於ViuTV播出的劇集《打天下》廣受觀眾歡迎，為該劇首度擔任監製及瞓身演出的歐錦棠早前受DJ梁泰來邀請，出席商台節目《1圈圈星光背後》接受訪問。
90年經由亞視訓練班入行的阿棠，直認94年主持亞視《今日睇真D》成為他首個事業轉捩點。節目中，阿棠坦言主持《睇真D》三年多令他每年「爆騷」，勁賺過百萬，帶來人生第一桶金。當年，就連周星馳都被阿棠的人氣吸引，邀他於96年參演《大內密探零零發》及《食神》兩齣電影。
阿棠說：「星爺嗰陣經亞視搵我，我咩條件都冇問就答應。《大內密探》係我人生第二部電影，拍劏外星人嗰場戲係冇劇本，拍之前星爺只係問我平時《睇真D》嘅VO（旁白）係點讀，我讀畀佢聽之後，佢就話『我就係要呢啲！』星爺好cool亦好聰明，就係要你最入屋嘅優點！」至於他主持了三年多就不再做《睇真D》，阿棠說：「三年幾咩都夠之後節目為撐長而做，因為我鍾意演戲想調去戲劇組，其間都被雪藏咗幾個月。」
歐錦棠入行前有過一段短暫婚姻，97年跟亞視訓練班同學萬斯敏結束7年愛情長跑成為夫妻至今。節目中阿棠承認兩夫妻曾秘密於2000年期間分居三年多，最後因為宗教，挽救了二人的婚姻之餘，亦治好阿棠的躁狂及抑鬱症。
阿棠說：「以前嘅歐錦棠係黐線，鍾意就發脾氣，我試過做《睇真D》用張凳掟同事，公司安排唔好就發脾氣。加上我哋97年結婚前未試過同居，婚後有咩問題，太太就受晒！佢去英國讀書嗰時我哋係協議秘密分居。最後，斯敏讀書後信咗主，成個人改變晒，冇再同我鬧交，我哋關係亦有所改變。其實04、05年我抑鬱症最嚴重，會無故崩潰爆喊。係太太帶信仰畀我，挽救我哋嘅婚姻，亦醫好我嘅抑鬱症。」
-----------------------------
App內1-Click訂閱《蘋果動新聞》
按此了解更多
來源 source: http://hk.appledaily.com
|
鍾意就快D Share啦！
|
|
|
