現今世代，在網上分享小朋友的生活點滴，對一般人來說再也平凡不過，但對明星夫妻來說，到底要否讓小朋友在閃光燈下成長，每個人擁有不同的想法，對於陳柏宇（Jason）和老婆符曉薇（Leanne）而言，只想給囡囡一個快樂而平淡的童年，認為沒必要收收埋埋，即使面對批評也大方接納，因為在明星光環下的他們，也只是一對平凡的家長。
Jason和Leanne 2017年結婚，翌年誕下囡囡陳羿辰Abigail（Abi），個個都稱她為阿標，只有19個月大的她，在鏡頭前非常淡定，全因平日「訓練有素」，有別於其他明星夫妻，陳氏一家不但不介意公開囡囡的樣貌，更主動大方分享私生活，讓大家一同見證Abi的成長，「我哋覺得以前同現在嘅年代，有很多嘢都唔同咗，我哋有討論過要唔要將Abi收埋，但我唔想令佢覺得佢嘅童年好特別，一看到記者就要遮住佢個樣，唔想佢覺得自己同其他人唔同，加上其實我先生一直冇當自己係藝人咁睇，佢會覺得自己係普通人，好似普通家長咁去分享佢小朋友嘅生活。」而自從Jason當爸爸後，更化身「晒囡狂魔」，幫囡囡開設個人Instagram賬號，追蹤人數破4萬，身為媽媽的Leanne卻表示最初不知道囡囡有IG，要從朋友口中得知，「Instagram係全權由爸爸管理，我連密碼都唔知，其實我好想一齊管理個IG，因為我覺得爸爸所post嘅相完全冇美感可言，我問佢我可唔可以係Abi個IG post相，他叫我自己幫Abi開一個新嘅IG account，完全唔畀我掂」，令她非常無言。
身為公眾人物，少不了面對批判，Leanne直言自己很喜歡去看留言，「記得第一個因為留言而感到傷心嘅post係當時我懷孕養動物，啲人話我地因為有BB而棄養動物，我覺得好嬲，因為其實我係一個好鍾意小動物嘅人，就算當時我先生對貓敏感，我都冇諗過畀啲貓人然後同佢一齊住，而係努力搵方法去解決呢個問題」，雖然感到委屈，但她學懂坦然面對，「你冇可能令每個人都鍾意你，只會有越嚟越多唔同嘅聲音，可以改變嘅就只係自己嘅心態，最緊要做好自己」，兩人更因為分享囡囡的生活而屢次登上新聞，最引起網民熱烈討論的，非Abi的沖涼影片莫屬，因沒有為囡囡「打格仔」而備受抨擊，Leanne表示無奈但明白，「我們覺得BB露上半身冇乜問題，但每個人嘅價值觀都唔同，雖然有人唔認同
，但大家嘅出發點都係好嘅，佢哋嘅目的都係希望我哋好好保護BB，而唔係想傷害我哋。」
升呢當媽媽後，近年轉型為KOL的Leanne也花不少心機為囡囡打扮，風格非常多變，「因為Abi個樣比較似男孩，所以之前會幫佢着得型啲，但最近佢頭髮長咗可以紮辮，所以就打扮得女孩啲，如果係爸爸同佢出街，通常都只會着牛仔褲同T-shirt，造型完全係兩回事。」Abi雖然年紀還小，但Leanne已經有計劃，笑言想生足三個，Jason卻拒絕，只因他愛女心切，「我老公喺Abi出世後同我講佢唔想再生第二胎，因為佢實在太愛Abi，佢想像唔到要將呢份愛分畀其他人，佢唔想對任何一個人不公平」，不過隨着Abi長大，也改變他的想法，「最近佢見到Abi好鍾意小朋友，有時帶佢出街見到小朋友，佢都會想去摸佢哋同佢哋玩，所以而家有計劃生第二胎」，不過Jason想生妹妹，Leanne就想生弟弟，意思有分歧，惟有聽天由命。
今個星期日是母親節，很多人都說當媽前後對母親節有不同的感觸，Leanne就坦言沒甚麼分別，「始終Abi仲係好細，佢唔會突然寫張卡畀我，所以冇乜太大感受，不過母親節對我地嚟講係一個好重要嘅日子，因為我同Jason都係來自單親家庭，所以我係母親節嘅角色就是去籌備同煮飯，今年都會同媽媽同奶奶一齊食飯」，平淡而溫馨，正正Leanne所追求的生活，她亦寄語囡囡，「我唔介意佢大個咗之後做任何工作，最緊要佢鍾意，同埋要咩心態去做」，相信所有媽媽都認同。
採訪、造型：高綽盈
攝影：郭賢興
服裝：Cocktail、REDValentino、Shiatzy Chen、Giuseppe Zanotti（on Leanne）
kids21（on Abigail）
飾物：Tiffany & Co.
場地：The Tiffany Blue Box Cafe
來源 source: http://hk.appledaily.com
|
鍾意就快D Share啦！
|
|
|