近年越來越多人投身Slash，何嘉莉（Lillian）也一人擔任人妻、媽咪和KOL多職，平日會在IG分享做運動與造型穿搭，稱得上是一位多功能媽咪。照顧小朋友不是容易事，更何況是三個，「每日最自由嘅時間就係小朋友瞓覺之後，最渴望嚟臨嘅時間就係九點。」
【三種相處方式】
自從成為媽咪，Lillian說生活上起了很大變化，「心態上就還好，因為自己都貪玩，如果見到朋友會唔記得呀媽身份，不過喺屋企對住佢哋就唔會。」Lillian形容小朋友出世前生活輕鬆，「每日鍾意瞓到幾點起身都得，可能之後食個brunch，但依家就好按規律行事，朝早七、八點起身，小朋友食早餐，搞一論之後又要nap nap，呀仔做功課，lunch time，玩一論，跟住食晚餐，每日9點之後先係我嘅free time。」
囝囝七歲，囡囡分別一歲及兩歲，面對三個不同年紀，相處方式自然也有不同，「我個仔比較靜，心思細密一啲，鍾意傾計，攬攬同鍚鍚；大女就比教男仔頭，比較active，自己會識搵樂趣，但有時又會嗲下你，最細個女一歲，暫時未知係點，不過感覺同大女又會唔同。」問到小朋友會否爭寵呷醋，Lilian笑說做媽咪好偉大，「我盡量做到好公平，但有時都會不足，盡量畀大嗰兩個先，因為細女一歲應該未識啲咩，佢有時坐學行車跟住哥哥姐姐跑下都好開心，所以盡量focus喺大仔大女，佢哋都會爭嘢玩，始終相差五年，有啲嘢會唔明，難免都會鬧交。」
【呀媽唔容易做】
不少父母都希望在子女的成長路上，扮演如朋友的角色，Lillian也不例外，「理想就梗係朋友啦，但理想同現實始終有分別，有時見到佢哋唔聽話，呀媽個格就會出咗嚟，我自己算係緊張媽咪，比較嚴格同注重品德，有時都會有呀媽款。」不過Lilian每日也會抽時間與小朋友互相傾訴，「臨瞓前會有story time，傾下計又會friend啲，講吓日頭發生咩事。」
不少家庭，爸爸都是「好人」，媽媽則飾演「壞人」，Lillian就笑指老公太過同一陣線，「有時我會話佢適當時要做吓好人，小朋友先會覺得有人做『和事佬』幫吓口，有時太過同一陣線，都驚佢哋反而會驚父母。」除了品徳，Lilian也很注重學習，她分享平日甚少給小朋友接觸電子產品，只會放假或週末才看卡通，不過近日受疫情影響，需要長時間留在家，小朋友都多了機會看電視，「唔出街有咩做呢? 呢個疫情睇得最多就係《仙樂飄飄處處聞 》，1965年嗰套，佢哋好投入，幾乎每日都睇，呀仔日日都播啲歌，呀女就日日都唱。」小朋友開心，但Lillian形容為疲勞轟炸，呀媽果然唔易做。
【靚媽時尚達人】
Lillian熱愛時裝，對打扮甚有心得，平日也會分享造型，但由於抗疫少了機會外出，也少了發揮空間，「今日髮型師先問我，平時會唔會喺屋企，無啦啦着靚靚等自己舒服吓，我話真係冇機會，會覺得湊小朋友着得靚都冇用，不過自己都會留意潮流，大概知道興咩款式、顏色。」
大家眼中的時尚達人，在穿搭方面也會遇上碰灰的時候，「男仔可以比較求其，可能純粹係顏色上，有時幫佢襯咗會reject，佢開始有自己喜好，但有時又會buy。大女比較男仔頭，有時買啲比較得意、女仔嘅嘢，佢會唔鍾意，例如買咗草帽，佢會話我唔要，我心諗算啦，仲有最細個女。」
【寓工作於娛樂】
雖然照顧家庭忙碌，不過Lillian都開始接觸不同工作，早前更回歸幕前，參與防癌會的微電影拍攝，「 因為好耐冇做幕前工作，導演係以前老師，剪接又係同學，成個氣氛好好，又好有意義，喺幕前演戲嗰時，都會覺得個感覺返番嚟，依家變咗工作反而係娛樂，平時喺屋企就係返工，有機會出去做嘢覺得好正，好relax。」
説到星期日是母親節，Lillian表示只會簡單慶祝，「依家多咗身份，除咗係人哋個女，又係人哋媽咪，但有三個小朋友，反而簡單慶祝，因為少時間，好難勞師動眾去準備，多數喺屋企食飯，開開心心就ok。」
造型、撰文：陳蔚渝
攝影：郭賢興
服裝：Tod's/ Sportmax/ Chloe
場地：Vive Cake Boutique
-----------------------------
App內1-Click訂閱《蘋果動新聞》
按此了解更多
來源 source: http://hk.appledaily.com
|
鍾意就快D Share啦！
|
|
|