今次佢知咩事即刻去醫院！
男神吳彥祖（Daniel）2019年3月經歷一場大病，因為盲腸發炎導致盲腸潰爛，更因延醫險喪命！豈料一年幾過後，佢喺社交網透露再次發生盲腸炎！
Daniel上載一張瞓喺病床上嘅照片，一面憔悴，佢以英文留言：「又發生了！」佢重提當時以為係食物中毒，所以等咗3日先去醫院，由於情況含晒膿腫晒，所以無法取出全部盲腸，結果就進行咗10日不進食嘅抗生素療程，瘦咗18磅，最後花咗幾個月時間先康復，之後佢被告知如果冇意外嘅話，係唔會再發生！
點知，佢話2日前突然病發，不過佢今次知道係咩一回事，所以即刻去醫院，尋日早上做咗手術，終於將盲腸切除一勞永逸，依家佢喺屋企休養！佢不禁笑問發生兩次盲腸炎嘅機會有多大？應該要去買彩票咁話！佢嘅好兄弟安志杰及MC Jin（歐陽靖）都留言祝佢早日康復！
來源 source: http://hk.on.cc
|
鍾意就快D Share啦！
|
|
|