陳國坤獲周星馳賞識入行，2001年參演電影《少林足球》因扮李小龍神似而為人熟悉，而撐警愛國的他近年主攻大陸市場，之前和同樣愛國的陳小春合演網劇《反黑》，又有觀眾認為他的樣貌越來越似古天樂。陳國坤日前接受車淑梅主持的港台節目《舊日的足跡》訪問，暢談跟人「撞樣」的感覺。
入行近20年來經常被指跟藝人撞樣，陳國坤笑言：「佢（古天樂）靚仔過我好多，由細到大都俾人話似李小龍，我只係有一次感覺到真係似，就係喺西雅圖見到龍哥（李小龍）墓碑上嗰張相。嘩！我都覺得似。」就連甄子丹亦多次提及陳國坤是史上最似李小龍的演員，他表示：「佢亦都係一個超級龍迷，佢咁講我個心卜卜跳，手心冒汗、面紅耳熱，直情有初戀嘅感覺，好想咀佢一啖。」對於有網民要求拍一套真正李小龍電影，陳國坤直言：「我都好想，趁住我而家仲後生仲打得，不過知道龍哥囡囡李香凝將版權睇得好緊，呢個係最大嘅問題，如果老闆黃百鳴可以解決到，我一定拼咗條命都要拍。」
李小龍在他心目中佔偶像首位，之後才是提攜他的周星馳：「我對周生好敬慕、溺愛、癡愛。周星馳比我更加李小龍，入咗血，記得《少林足球》有一幕我俾人打到豬頭咁，好多人飛啲鞋過嚟，我接住變成一個足球向前擺返出嚟，但係擺極都唔似，俾星爺鬧：『仲話自己係李小龍，有冇搞錯？』最後佢頂我唔順示範，果然似到十足，我喺胸前放出嚟成個黃飛鴻咁。周星馳拍戲好認真乜都理，太陽曬到佢起咗件背心印，旁邊啲肉紅到凸起都唔理。」
坊間對周星馳為人褒貶不一，「忘恩負義」、「落井下石」的批評是對或錯？陳國坤回應：「只係嗰啲人唔夠了解星爺，行得未夠近，遠睇睇得唔清楚。我跟足佢8年日日見面，我見過佢生活上嘅細節，佢對後輩嘅態度……我明白唔同角度感受會唔同，如果感受唔好，希望佢哋會原諒、包容。有一句說話『不招人妒是庸才』，我佩服佢處事嘅態度，佢比任何一啲俾人話係好人嘅人，更加做得好，因為佢選擇沉默，一味工作唔反駁，佢冇暗裏打人哋兩拳，只係專心工作拍戲。」
最近周星馳與于文鳳有訴訟，再次成為娛樂新聞人物，陳國坤表示沒為偶像打氣：「嗰啲係佢嘅私事，不過又係一件幾開心嘅事……因為星爺（出庭前後）嘅金句帶畀大家一種歡樂，好難得佢一直保持一種正面態度，去面對各種困難，佢時時都話冇嘢有問題，一定搞得掂。」兩人雖然多年未見，但每逢節日都會以短訊聯繫，他自言最大心願是繼續做好自己，希望偶然讓星爺想起自己，賜予他角色，並期待再合作。
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
