解《迷》團！玩埋人鬼戀 田蕊妮終極發癲 墮樓唔死得
熱播劇《迷》近日掀起城中熱話，女主角田蕊妮（阿田）「成魔之路」發揮淋漓盡致，連老公杜汶澤都讚演技可媲美偶像積尼高遜！今日大結局，本報獲得「獨家劇透」，連愛徒吳業坤都殺的阿田與鄭嘉穎的感情線難捨難離，但泥足深陷而精神失常，最終被送入精神病院。
無綫劇集《迷》高潮迭起，今晚將播出兩小時大結局，狂魔「計穎妍」（田蕊妮飾）的下場引起網民諸多猜測，喪盡人性的她連續幾集屢開殺戒，借刀殺人令大奸角何啟南命喪黃泉外，還向得悉其奸計的徒弟吳業坤下毒手，究竟最終結局還有沒有人要落地獄呢？
本報昨日收到「獨家劇透」，昨晚一集講述阿田與鄭嘉穎墮入愛河後發生關係，想不到百密一疏，她於睡夢中呼叫：「阿榮（吳業坤飾），你唔死唔得！」結果引起嘉穎懷疑而作出深入調查。阿田有感自己與嘉穎難捨難離，內心忐忑令情神狀態陷入崩潰，最後飽受情緒衝擊下進入瘋癲狀態，更因失足墮樓但大難不死，結果被送入精神病院度餘生。而劇中身為坤坤曖昧對象的賴慰玲則透露結局會大玩「人鬼戀」。
鄭嘉穎唔介意被搶Fo
對於連日來的劇情可以盡騷演技，睇到網民激讚「連睫毛鼻涕都識做戲」，阿田接受電話訪問開心地說：「真係只能講句多謝！我會繼續努力嘅，最緊要觀眾鍾意。（冇好下場？）我只可以話自己個角色喺現實生活同心理都去錯咗位置，結局會去到一個自己認為最舒服嘅地方囉！（殺埋嘉穎？）佢其實好矛盾，大家感情啱啱開始，但又要鬥智鬥力，想知我哋點？真係要今晚留意！其實當初接到劇本，我都睇到癲癲哋，用咗好多時間去研究點做，壓力好大，不過能夠遇到呢個角色係我嘅福氣，唔想錯過佢。」阿田又笑指演技嚇親賴慰玲與吳業坤兩位「小朋友」，今日提早收工的她將在家中與兩人飯敍，由老公杜汶澤親自下廚，齊齊欣賞大結局。而拍檔鄭嘉穎被問到會否介意遭阿田搶Fo？他說：「監製話想畀我試吓唔同角色，今次就做小男人角色，其實阿田要咁樣情緒起伏係好有難度。（唔一齊睇結局？）我要幫音樂劇《風雲》全日綵排，惟有叫阿田加油啊！」
杜汶澤當老婆係偶像
老婆演技獲得好評，阿澤亦讚阿田演得好：「直情可以媲美我偶像積尼高遜嘅《飛越瘋人院》！作為演員及導演嘅我，太太有咁嘅表現都覺得驕傲。一個演員最大嘅鼓勵係好嘅劇本同角色，我諗阿田已經得到佢想要嘅嘢同滿足感。（佢同嘉穎演床上戲唔呷醋？）電視嘅尺度有幾闊呀？同我喺日本拍嗰啲冇得揮！內心戲我唔夠佢嚟，但講到床戲佢點都追我唔上嘅。」
文：影視組
|
鍾意就快D Share啦！
|
|
|
