因為化妝師April喺fb爆咗一單「新娘唔找化妝師尾數」嘅事，聲稱入行做咗新娘化妝8年，竟然遇到一對極品新人，過程更遇上奇恥大辱，結果呢件事迅速成為全 ...
因為化妝師April喺fb爆咗一單「新娘唔找化妝師尾數」嘅事，聲稱入行做咗新娘化妝8年，竟然遇到一對極品新人，過程更遇上奇恥大辱，結果呢件事迅速成為全城熱話，網民個個買定花生睇留言，有人戥化妝師唔抵，亦有一對新人嘅姊妹開po撐好友，今日《蘋果》打俾今次事件嘅當事人化妝師April，佢語氣平靜咁話：「暫時唔方便講，我仲處理緊件事。」其實喺April開PO嘅當晚，有警訊之花之稱嘅馬溱禧(Heily)，去咗April嘅fb留言力數喪插兼力撐新娘，不過不單對事件冇幫助，反而激起另一場罵戰，最後Heily刪PO。同新娘子認識多年嘅Heily，今日接受《蘋果》嘅電話訪問，講到呢件羅生門事件，佢話自己當晚都有出席：「其實係冇走數，嗰陣因為化妝師準備要走，喺新娘子送緊客，化妝師話如果過多10分鐘又要收OT，於是新娘子咪搵兄弟去安排，點知兄弟攞咗化妝師嘅手寫單之後，發覺本來張單係寫OT錢原本係300蚊，但係有人手寫改咗係500蚊，可能係誤會喇，點解會寫多咗錢，為咗證明係佢改嘅，啲兄弟咪叫佢寫番張紙作實喇，以免令新娘同新郎有誤會，以為係兄弟問題。」Heily再話：「化妝師話人哋唔肯出OT錢，其實根本唔係唔肯出，只不過係想清淅啲，點知佢又話人哋圍佢，走去報警，仲驚動啲親戚，佢哋覺得話晒係大喜日子，點解要叫差人嚟，所以都走過嚟了解吓發生乜嘢事。咁啲親戚有男有女，唔係圍佢咁嘅意思。」有指當時兄弟專登「唱銀紙」找數，佢就話：「銀仔係因為的士錢係31.8，所以真係俾咗1.8銀仔，而唔係整條數都俾咗銀仔，可能係大家誤會咗。」不過有人覺得化妝師態度有問題，唔知係咪因為呢個原因而唔俾錢？Heily話：「佢哋試妝嗰陣都冇問題，到咗正式嗰日，覺得佢喺態度上有問題，但係新娘子冇辦法即時搵過一個化妝師，又驚夜晚個妝俾佢化得唔好，唯有大家都唔出聲。」佢堅稱係冇拖數：「只不過係個尾數唔明張單點解會劃咗，我明白啲兄弟，佢哋唔係喺化妝其間去交涉咗OT錢係幾多，我明白OT錢係必需要俾，因為真係用咗啲工作時間，只不過係覺得加咗嗰個錢，就要解釋好啲，唔好郁吓就報警。」Heily否認新郎哥係警察，對於勁起底，佢話：「佢哋喺自己個FB有回應，我覺得佢哋未必會出嚟再講。0依家呼吸都係錯，網民覺得睇完化妝師講完嘅說話，都覺得係新郎新娘唔啱，我都明白化妝師有佢嘅意見，但係我哋見到又唔係事實嘅全部，所以我先會出聲。網民講呢啲嘢都唔需要法律責任，都係食花生，以訛傳訛咁，又作咗好多版本，話佢租車唔俾錢，其實唔係。」
