現年24歲嘅林頴彤（Bella）上年情人節宣佈拍拖，男友係大台22歲奀星容天佑，點知拍咗半年拖，就話好忙少見面而分手，淨係可以做番朋友。（新聞連結： http://bit.ly/2npXPWx ）呢半年嚟，Bella每次喺活動上講到感情狀況，都堅持自己係單身，未有人追。如果冇時間見面，所以先做番朋友，咁好得閒，可以見足成日呢？《蘋果》日前下午5點左右，見到林穎同容天佑喺灣仔星街附近行街，接近收工時間，行人都幾多，Bella當時戒備心都幾重，帶晒口罩同容天佑分得好開，直至見周圍少咗人，就親密起嚟，頭貼頭睇電話，林穎彤仲將右手放入容天佑件雨絨衫袋取暖。兩個人沿路行到皇后大道東搭的士去舊灣仔街市，等車期間容天佑煙不離手，Bella喺身邊就一啲都唔介意。兩人喺舊灣仔街市嘆住咖啡，坐咗半個鐘就起身離開。專登騰空一日出嚟，邊可能咁快返屋企？佢兩個人嘆完咖啡，call Uber由灣仔去荃灣愉景新城，一落車就入咗足浴店打算揼骨，不過唔使一陣兩個人就出番嚟，原來佢哋係去錯地方，即刻再搭的士去荃新天地另一間足浴店。呢程由荃灣去荃灣嘅的士，中間都要停唔少紅綠燈，Bella同男友就把握時間，喺車廂內捲下對方頭髮，又搣下對方個鼻，玩玩下容天佑仲身個人挨咗落去Bella到。呢次Bella同容天佑就揼足兩個鐘，過咗9點先出番嚟，由男友埋單俾錢。成身鬆晒之後兩人再喺商場行咗陣，冇咩收穫轉場去甜品店食糖水。成個夜晚淨係喺灣仔飲咗杯咖啡，所以Bella呢餐都幾開胃，連續食咗兩碗先夠，而Bella嘅戒心明顯冇朝早咁重，除低口罩同容天佑傾得好開心。Bella食完嘢，又輪到容天佑食煙，佢再次邊食邊截的士，送Bella返葵涌公屋屋企。拍拖拍足一日，Bella對呢次約會好滿意，喺屋企樓下轉角處送咗個緊抱俾男友，容天佑都好受落咁攬住Bella左搖右擺，纏綿一輪，容天佑先目送Bella上樓離開。《蘋果》第十二屆金話梅電影選舉（Golden Plum）又嚟喇!由今日起，請在以下網址（http://campaign.appledaily.com/goldenplum2017 ）投票，選出心目中的爛片之霸，截止日期係4月6日，賽果將於香港電影金像獎舉行前夕（4月8日）揭曉。
| 林頴彤同容天佑復合斷正，拍拖玩足一日，喺屋企樓下旁若無人攬攬告別。（採訪、攝影：黃曉程、羅德光、梁繼光） | | |
| | | |
| | | |
| | | |
| | | |
|
鍾意就快D Share啦！
|
|
|
