藝人方力申（小方）、鄧麗欣（Stephy）與任賢齊（小齊）出席第五屆揹水一戰比賽，舊情人小方與Stephy初時表現有點避忌，未肯應記者要求合照。大會先叫小方上台，然後才到Stephy和小齊，小方遞咪給Stephy，但二人在台上幾乎沒有眼神接觸。小方用手機拉眾人自拍恭賀片給曹星如，並叫他下屆一起跑。到起步禮時，三人與點滴是生命會長李彩芬合照，雖然小方與Stephy中間隔了會長，但兩人搭着會長時卻難得地搭到對方的手！
唔想喺鏡前做戲
訪問時，記者笑指小方今天要力追比他先出發比賽的Stephy，他笑言：「頭先幾次都引我講呢個字，爭15分鐘喎。隨緣啦呢啲嘢，我哋係一隊完成比賽㗎嘛，我仲要照顧會長同小齊，我又冇練，所以以體驗山區農民每日揹水嘅生活為主。」他表示擔任大使8年，以往探訪過幾次，知道很辛苦：「今年唔講成績，唔使咁快，見到（Stephy）咪見囉。（你哋冇乜交流？）係呀，少啲，鏡頭面前、人群面前更加少，我哋好真實，從來都唔做戲，所以更加唔知點做，講嘢又唔知點，唔講嘢又唔知點。」
懷念回憶多過個人
提到大合照時二人的手有搭着，小方卻指不知道：「係咩？有搭住咩？我唔知喎。（冇感覺？）真係唔知。（隻手太熟？）慣咗。冇揈開？咁幾好，幾有禮貌。冇感覺，咁得意？要睇番慢鏡，唔記得。」談到分手一周年，他直言覺得很快，有看粉絲在社交平台tag他們的post，覺得粉絲很長情。問到他是否長情？他說：「唔講咁多啦，冇力跑呀。（感觸？）梗係有啦。（心酸？）本來冇，你愈講愈有，唔好再講。有句說話，你好多時係懷念個回憶，多過懷念個人或者件事。人會move on，但回憶喺腦海，會愈嚟愈淡，但始終都會記得，但冇得留住一個人，無論愛人定親人都好。你咁問，諗番都係咁多年嘅回憶囉。」
有同Paco傾續約
至於與公司約滿兩個月，他坦言有傾過：「我同Paco（黃柏高）咁多年，佢睇住我大，到我簽咗內地公司，3年再返香港，都有分開過。後尾冇續約，佢都話個圈好細，我都繼續有機會拍佢嘅電影同合作。」他強調關係一直很好，但暫時未有新去向，Paco有給他空間作不同發展，自己不急於找合作夥伴。問到會否與Stephy合作開公司？他說：「梗係唔會啦，以前都講過，我哋工作上都係佢有佢做，我有我做，冇理由依家合作開公司。」
|
鍾意就快D Share啦！
|
|
|
