現年31歲嘅「宅男女神」樂瞳去年約滿大台後，離巢獨立發展，搏命出騷賺錢自食其力，忙碌工作又呻冇拖拍好dry。不過佢近日卻捲入一單欠租事件，仲見埋報。
報道指，樂瞳與圈外男友租住深井某屋苑大單位，月租約兩萬。租客卻以單位電器等設備有問題，拖欠兩個月租。
《蘋果》日前中午發現樂瞳離開被爆出欠租嘅深井單位，同行有一名年約30餘歲男子做柴可夫，駕駛其凌志房車離開。運輸署資料顯示，凌志房車登記車主名字叫羅慎安。
樂瞳同羅慎安直抵圓方，男方負責泊車，兩人暫分道揚鑣。淡妝的樂瞳木無表情，相約DJ Tommy（張天誌）夫妻洽談工作，羅慎安識做唔阻住。
傾完公事，樂瞳先行離開，邊行邊低頭玩手機閒逛，然後又行下平民時裝店H&M。行咗陣冇收穫，未幾樂瞳收到電話，就行番去停車場，會合方才車佢嚟嗰位柴可夫返深井寓所，男方仲貼心地將架車停喺門口，放低樂瞳，再揸走架車泊番去出面爛地停車場，搞掂晒先返上樓。
《蘋果》今日致電樂瞳，問到佢係咪蜜運中？同行男子係咪羅慎安？佢話：「其實我嗰日約咗朋友去圓方傾公事，咁啱又約嗰位朋友（羅慎安）講啲嘢，所以見到我跟佢返咗屋企。」兩人有乜要返屋企傾？樂瞳解釋：「我哋呢排幫微笑行動呢個慈善組織搞活動，我係其中一個義工，有時我哋會約埋去佢屋企開會，貪靜啲，幾個朋友傾正經嘢，冇乜特別。」
樂瞳重申：「我哋當然唔係同居情侶，我講過我仲係同屋企人住，真係開會先同其他義工傾嘢。」但羅生又會咁熱心做埋柴可夫？真係做義工咁做喎！樂瞳稱：「因為佢好gentleman，深井真係好偏遠，朋友都考慮到我身份（公眾人物），未必方便成日出去傾嘢，喺屋企方便啲，我反而冇顧慮到，就令人誤會。」
羅慎安咁抵得諗，兩人可有發展空間？樂瞳大方話：「共事都希望大家發展都好，我好欣賞有善心嘅人。」言語間似乎好欣賞對方。
至於欠租問題，樂瞳稱：「朋友都有覺得唔好意思，出嚟新聞變咗我欠租，我其實唔識業主，亦冇任何contact，哪來欠租？對我有啲唔公平。
「作為公眾人物，我唔可以為佢（羅慎安）發聲。有時做藝人係有少少慘，好似做少少事就俾人無限放大，朋友事件都套咗落我身上。」樂瞳謂正了解事件中，並稱：「我支持佢據理力爭，希望可以盡快平息。」
樂瞳再講番微笑行動係趙曾學韞做籌委主席，樂瞳話：「微笑行動幫兔脣小朋友籌錢做手術，我仲會幫佢哋活動做司儀同探訪，好有意義。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|