本身係澳門人嘅小肥（徐智勇），〇七年過江嚟到香港做歌手。當時佢以「毒男」姿態，唱出金曲〈寵物〉，成功喺香港樂壇站穩陣腳。入行至今都十幾年，小肥一直冇乜緋聞。六年前，有個網紅「慈雲山鄭列瓊」就爆大鑊，話小肥喺微博關注好多半裸大隻男，暗示小肥係「基民」；不過，小肥當時就話：「我唔係基，但唔歧視同性戀。」
日前，小肥上咗陳志雲嘅網上節目《Stephen．傾》，公開「出櫃」。志雲大師好直接咁問佢性取向：「有件事，你同我好似，記者成日問我係咪鍾意男人？有好多人咁問過你，你通常點樣耍開佢哋？」小肥起初都答得好隱晦，支吾以對咁。不過，佢同志雲大師愈傾愈深，話題愈鑽愈入，入到一個位置，唔知係咪大家同聲同氣，小肥好自然咁點頭承認鍾意同性嘅性取向：「係呀！」
佢隨即好似如釋重負，更加眼淚如泉湧：「你真係大師，唔知點解你一問我，我覺得好似係時候要行呢一步。」
小肥同志雲大師，之後就愈講愈多，仲透露自己有拍過拖，先後兩個男友都係圈外人。第二段感情仲維持咗十年，當時男友成日要北上工作，佢就作咗首歌〈你明日回來〉送畀對方添；可惜最終喺一八年分咗手。佢又話作為藝人好難搵對象，有時就會去同志酒吧，搵志同道合嘅朋友傾吓偈。
小肥「出櫃」後，喺社交網留言：「驚魂未定⋯⋯嚇親大家，唔好意思。仲好緊張，但我自豪。」佢班fans立即留言支持，其實咁多人撐，使乜驚啫！
與志雲大師同聲同氣嘅小肥，話唔知點解一見到對方，好自然咁衝開枷鎖，公開「出櫃」。
小肥喺陳志雲嘅網上節目《Stephen．傾》，喊爆公開「出櫃」，場面好感人。
公開「出櫃」之後，小肥喺社交網留言，對於自己踏出呢一步，感到自豪。
來源 source: http://eastweek.my-magazine.me
|
鍾意就快D Share啦！
|
|
|
