莫家淦 陳國峰日薪$900炒散搬貨
新冠肺炎疫情令經濟蕭條，同樣經營生意的藝人莫家淦及陳國峰，生意受創大不如前。司儀、商演工作幾乎全面叫停，收入大減。「仔細老婆嫩」的二人，秘撈散工做埋搬運工人，用勞力撐起成頭家！
憑處境劇《愛．回家之開心速遞》成功入屋的藝人莫家淦，本身的眼鏡及手錶生意受疫情影響大受打擊，加上出埠登台亦因疫情需要隔離而擱置，雖仍有劇開，但收入大減，為了養家中兩條「化骨龍」，他狂接網上小型廣告外，更被拍得與好友、憑《殺手》人氣上升的陳國峰齊齊做搬運工人「秘撈」搵外快。
有讀者爆料指目擊二人現身貨櫃場開工，他們穿上寫有能源公司名稱的制服、戴上頭盔及口罩，在工友指導下，將大量大型的太陽能板搬上貨櫃車，二人話頭醒尾，來回多次搬運，相當落力。出名大力的陳國峰亦顯得吃力，莫家淦更搬到滿頭大汗狀甚辛苦。之後二人與一眾工友席地而坐放飯，快快「扒完」飯盒後，又急急腳繼續開工。
紅隧撞車有驚無險
有指莫家淦的手錶及眼鏡店分店由六間縮至四間，而今年成為兩子之父的陳國峰，主持多年的節目《兄弟幫》今年初停播，變相失去穩定騷錢，據知他有份投資的拉麵店現時亦只剩下一間總店，生活逼人。對於被爆做搬貨養家，記者聯絡上莫家淦，他澄清是幫朋友：「其實係有朋友要請人搬啲太陽能板，一工900蚊做9粒鐘。佢未搵到人，我哋又有時間咪幫吓手，一次啫！」他承認現時工作大減，為家計在所不計：「有少少錢嘅就算係娛樂圈以外嘅工作，都唔介意去做。」他坦言舖頭生意蝕住做，幸仍算「頂得住」。而陳國峰受訪時指拉麵店生意的確有影響。
另外，莫家淦昨日在紅隧發生交通意外，他事後受訪表示：「成架車炒咗埋雪糕筒，好彩除咗側鏡外，架車整體冇事，我即刻去拜神。」
來源 source: http://orientaldaily.on.cc
|
鍾意就快D Share啦！
|
|
|
