可嵐難忘遭前夫凍水淋醒 離婚後曾做特技演員賺錢養囝囝
2008年出道做歌手、現年36歲的可嵐（Colleen），曾經歷歷時四年的家暴，前晚（6日）擔任《360秒人生課堂》的演講嘉賓，旁聽嘉賓則為同樣曾遭受情傷問題困擾的林雅詩，以及Patrick Sir（林溥來）。
Colleen最初為了囝囝幸福，決定啞忍前夫家暴；但最後也是因為囝囝一句「No Daddy！Cannot hit Mummy.」決定離開錯的男人、與兒子重過新生活。談到四年的陰暗歲月，Colleen坦言每晚等前夫回家時都是心慌慌：「嗰晚我聽到好大聲閂門聲，我心知不妙，就詐瞓一路唔出聲。佢行埋我床邊，係咁同我講嘢我冇應，過咗一陣，佢拎住一盤凍水淋醒我，嗰刻真係好驚。」
離開前夫後，Colleen獨自肩負養大兒子Eugene使命，但由於歌手收入不穩定，經濟壓力及心理創傷令Colleen一度情緒崩潰：「我每次都打畀同一個朋友係咁喊，有一日我朋友叫我唔好再打畀佢喊，佢話：『我話畀你聽你點解喊吖，因為你冇錢！』佢講中咗我死穴，但我只可以喊住否認，因為我覺得自己冇能力。」
做特技演員打到周身傷
面對好友愛之深、責之切，Colleen終「發奮圖強」拼命賺錢，一人打七份工，教沖咖啡、教唱歌、做電台主持、做保險、Marketing，就連動作特技演員都做埋。有一日她拍完打戲成腳都是瘀傷，當時只有4歲的兒子等到深宵未眠，Colleen跟囝囝講對唔住，小朋友的反應令她永世難忘：「阿仔當時摸住我啲瘀傷，眼紅紅咁望住我，我哋就係咁樣攬住喊。呢個畫面令我之後就算遇到任何困難都唔會放棄。」
堅強面對逆境、成功走出陰霾的Colleen，坦言一度很介意被標籤「單親媽媽」及「家暴可嵐」，她表示：「但我而家唔介意，面對家暴同單親係冇得揀嘅，但我哋可以選擇唔放棄。我冇放棄到我小朋友，我繼續畀心機好努力、好正面咁過我嘅人生。（離婚）七年嘞，我依家擁有自己嘅餐飲事業、仲可以繼續做歌手同拍戲，所以關鍵係在於我哋嘅選擇。」
更多新冠疫情資訊，請到以下專頁瀏覽 按此
立即下載 | 全新《星島頭條》APP : https://bit.ly/3yLrgYZ
|
鍾意就快D Share啦！
|
|
|
