掃呢頁CODE去手機

2015年6月25日 星期四

落手落腳做阿四 張可頤踩入元朗辦學 [壹週刊 - 1320] 張可頤,M1,



探熱針

落手落腳做阿四 張可頤踩入元朗辦學

張可頤最近唔聲唔聲,在元朗開了間興趣學習中心,失驚無神踩過界,原來與她修讀了一個關於情緒病治療課程有關,藉住開興趣學習中心,學以致用。「我想試吓放開藝人身份,趁住仲有氣有力,做啲拍戲以外嘅嘢!」張可頤說。

又搬又抬

上星期二(六月十六日),手上拎住袋手造絲花、一大卷顏色畫紙同一袋卡通軟墊的張可頤,與兩個朋友現身元朗市中心,其間因為太多嘢,畫紙跌晒落地,十分狼狽。

之後再會合多一男一女,同到元朗康樂路附近落車,一行人夾手夾腳從車尾箱卸下大量物品,開工向來有助手服侍的張可頤,亦落手搬嘢,一大箱雜物加植物,又唔理自己著住裙,照踎上踎落。

行了一段路後,其中一人主動幫手接過張可頤手上一箱雜物,最後上了一幢唐樓。

現場擺放了不少手工藝公仔和兒童讀物,陳設形同小朋友的學習中心,只見張可頤在場內打點一切,又踎低用拉尺度位,前後在內逗留了近三個小時才離開。

張可頤表示想放低藝人身份,切實地試吓去做另一樣事情,所以就算要做阿四擔擔抬抬都冇所謂。

攞住勁多東西的張可頤,手忙腳亂搞到跌嘢,相當狼狽。

著住裙的張可頤更踎低用拉尺度位,唔怕走光。

張可頤在中心手指指俾意見,而店內有一個張可頤在《九五至尊》呂四娘造型 Q版公仔。

準備開業

星期四(十八日),張可頤再出動,與兩位朋友到元朗三聯書局搜購手工藝勞作材料,見現場有勞作示範,她表現得相當有興趣,邊睇邊問,又攞上手研究,好主動。

買完材料,一行人再會合其他人到一間餐廳開會,枱面上除了文件,還有不少手造勞作。

據了解,張可頤與朋友合資在元朗開興趣班學習中心,開業在即,張可頤要頻頻撲撲,準備一切。

張可頤承認辦學習中心,但不允透露投資金額。

「我投資咗好多心機落去。(會唔做幕前?)我想退休好耐啦,講笑啫!呢個時間我比較得閒,唔使開工住,所以做啲自己想做嘅嘢。」張可頤說。

有消息指王維基將會暫停再開劇集,曾經幫他拍劇的張可頤表示,唔想諗得太悲觀,仍相信有奇跡會出現。

近年頻頻北上發展的張可頤,剛剛在上海完成了一部大陸劇,原本會接一部新加坡劇,但因為要搞這間中心,唯有推戲。

主持講座

忽然辦學,張可頤事出有因。

「大半年前,我開始接觸情緒病同大學科研嘅課程,跟咗啲醫生上堂,好想將學到嘅嘢去幫人;咁啱有啲朋友想搞學習中心,我提議加埋有關如何培養小朋友情緒同人格嘅課程,可以做得更多元化,因為成年人同家長都可以讀,我哋都會照顧到。(資金要幾多?)投資咗少少,仲有幾個股東,對我嚟講係一個突破,今次我放低演員身份,嘗試真正融入社區。」

張可頤出錢出力百分百投入,並表示稍後會親自主持有關情緒控制的講座。

「我係個阿四,乜都會參與,呢個係我人生新一頁。(會唔會藉此鋪路轉行?)當然唔會,上天俾我有演戲細胞,我唔會浪費,只係會分配時間,去做啲開心或者想做嘅嘢,想趁自己仲有氣有力,做啲拍戲以外又有意思嘅事!」張可頤說。



上星期四,張可頤到元朗一間 Coffee Shop開會,其間不時攞住啲手造公仔研究。

上星期六,學習中心低調開張,張可頤與其他股東一齊開香檳,而馬浚偉送上花籃道賀。

張可頤親自去到書局揀一些勞作材料。

興趣變事業

藝人副業,不離開鋪搞生意,但亦有不少利用個人之長,將興趣發展成個人事業。

黃佩霞 鍾麗淇

投身教瑜伽行列,成立 Pure Yoga,搞得有聲有色,其後鍾麗淇亦加入做全職導師,憑住人脈關係,招攬不少名人明星學生,包括伍詠薇、周麗淇、蔡一智夫婦等。

吳綺莉

吳綺莉和女兒卓林早前母女檔到天水圍「特殊學習需要家長協會」,擔任義工開班教畫畫,幫助有需要的兒童。

狄易達

跳舞高手狄易達六年前在旺角租了個八百呎單位開班教跳舞,因為學生愈收愈多,要搬往九龍灣四千呎新校擴充營業,豪花百萬。

譚小環

轉行做生意的譚小環,除咗開魚蛋檔賺到笑,更投資七位數字於銅鑼灣開店賣手作素材和自家製作品外,亦會開班教 DIY心意卡、相架、利是封等。

鍾意就快D Share啦!