長實(001)北角DIVA已經入伙，資深驗樓師詹濟南「詹Sir」今日驗收一個實用近500方呎的兩房單位，竟出現三大嚴重「甩漏」！第一個「案發現場」出現在長約15方呎，放係客廳的特長窗台。詹Sir用支棍掃一掃對正窗台嘅天花，一邊徒手敲下天花，一邊講：「夾埋有8個地方係空心，鬆泡泡咁，呢啲係批盪黏唔實個底，聽到撞擊聲，是同個底部分離咗……
殊不知，「哎呀!真是(天花批盪)裂咗！」全新樓，天花竟然捱唔住人手敲打，即場出現裂縫，詹Sir話：「咁係天花批盪剝落先兆，咁要剷咗佢再批。」他估計，隨時幾個月之後，呢啲空心批盪就會跌落來。
詹Sir表示，驗咗DIVA十多個單位，出現呢個情況的單位唔多，咁啱今日驗嘅呢個單位失咗手！
驗完個「脆弱的天花」，詹Sir就去驗露台，露台門向客廳係有門柄的，點解要講明，係因為……
詹Sir行出露台，閂埋度門，發覺露台門向外個扇門頁無門柄，佢笑言：「估唔到驗樓，要用少林寺嘅大力金剛指…加個門柄，咁咪唔駛用少林功夫囉！」
近年新盤露台通常都是趟門式設計，估唔到今勻北角DIVA竟用開揭式，門柄消失了之外，露台可用空間亦少咗……記者跟詹Sir上樓之前，就聽到有另一位業主向發展商投訴呢種門，叫人點用露台晾衫喎！
最後，詹Sir行入廁所，企上個馬桶度，嘩！搖得郁嘅！詹Sir話：「坐廁裝得鬆，咁你坐上去就會郁一郁，每一郁就會掹到條來去水喉，掹得若干年，會突然爆，應該要整返緊個坐廁。」
本報記者陳家雄
|
鍾意就快D Share啦！
|
|
|
