王菲將童童交給經理人陳家瑛，全力護航愛女做國際級歌手「 Leah Dou」。（《蘋果日報》圖片）
探熱針
大手筆 跑馬地自設千萬錄音室 陳家瑛打造童童冇手軟
十八歲王菲女竇靖童承繼衣鉢，亦接收埋睇住自己大的經理人陳家瑛，新歌《 Chimes》上月在網上發表，又到倫敦拍 MV；為了將童童打造成國際級歌手「 Leah Dou」，陳家瑛在兩個月前一擲千二萬，購入跑馬地一個單位，作為童童私人錄音室，為年底於日本出碟，做好一切準備。
日本出英文碟
自一二年開始，遺傳父母音樂細胞的童童，每年都有新歌發表，明顯是為入行試水溫。完成中學課程的童童，經過再三測試，外間反應一面倒有讚無彈，決定再踏出一步，簽約陳家瑛，正式出道。
同王菲關係密不可分的陳家瑛，對擺明有條件的童童悉心栽培，處女碟到英國錄音，今個年底，將會在日本推出首張英文專輯，落重彈藥
包裝。
「童童叫 Katie（陳家瑛）做阿婆（音 Paul），佢喺香港期間，都係住 Katie淺水灣屋企，為咗令童童有更多創作空間，今年四月 Katie仲喺跑馬地買咗個單位，用嚟改裝做 studio，話等佢可以有自己地方做音樂。未計裝修器材設備，個單位都要千二萬， Katie對童童好有信心，亦充滿期望。」王菲身邊人說。
王菲全面停工
有陳家瑛做燈塔，但王菲依然緊張，童童每次完成新歌，都會先給媽咪試聽攞意見。
「阿菲近年大部分時間都留喺北京陪霆鋒，之前傳佢有 BB，阿菲就更低調，佢本來應承咗劉國昌拍《陳華傳》，仲指定要同劉青雲合作，不過突然變卦唔接。部戲預咗八月底開，批文都出晒，阿菲推咗，而家搵緊周迅，如果周迅都唔得，就未必開得成，因為青雲得八月底個期可以。」知情者說。
至於有指王菲準備在今年舉行巡迴演唱會，並安排正式入行的童童在個唱中演出，但因為王菲突然全面停工，個唱亦無限期押後。
「如果阿菲開個唱， Katie就好唔得閒，因為佢一定負責製作，亦變咗冇時間理童童嘅嘢，童童初次出碟，阿菲一定要 Katie睇到實，所以根本冇可能今次做巡迴。」王菲身邊人說。
|
鍾意就快D Share啦！
|
|
|
