司儀張繼聰、蔡卓妍現身紅地毯，阿Sa一條明黃色裙加tube top明艷照人。張繼聰一臉緊張，紅地毯司儀卓韻芝笑佢地一邊行紅毯一邊背稿，阿Sa就繼續keep住叉腰拗腰甜笑pose，狀似輕鬆。
阿芝篤爆阿Sa噚晚同佢講話驚到不得了，兩人受訪時又被問背晒稿未？阿Sa就話最驚係人名：「真係好奇怪，有啲人明明成日見，係friend嚟，但出現一堆人裡面，就好難記。」余迪偉就笑佢可能嗌錯 平時私下嘅花名。
至於阿聰就話，好彩佢同阿Sa之前合作拍劇，得閒就傾下今晚流程，加強默契。又感謝背後近一百人嘅幕後功臣，準備咗幾個月，希望大家感到誠意，同埋享受今晚呢個盛事。
阿Sa受訪時謂今晚件衫係贊助嘅，「做主持太多嘢記，不可以分心喺衣著。」又猛話好緊張，噚晚好多朋友send message叫佢唔好緊張，「當玩得0架喇，唔好緊張，當玩得喇。我心諗：『你做吖！』」佢又話唔怕阿聰爆肚，因為之前合作拍劇，已有默契，但講完之後又話:「唔知呢，依家好亂!」
兩位大會人行完紅毯後受訪，阿Sa讚阿聰套黑西裝襯衫易，夾乜都得。阿聰話「噚晚綵排去到11點幾，今朝再排好順利，有溫情有緊張位。」過程中講到被提名嘅人名，佢都有諗係邊個贏，問到睇好邊個？阿聰搞gag：「我淨係睇好自己份稿。」
阿Sa就話好多人叫佢享受過程，唔好咁緊張，不過佢就呻：「你做丫，唔緊張。」佢話有人叫佢搵啲口才好嘅人練習，阿Sa就話問過李克勤拎心得。
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
