掃呢頁CODE去手機

2015年12月23日 星期三

《你估真係咁多港女咩?》潮文勁 share 創作人撐:女人付出比男人大 [FACE - 448] MF,

編劇 陳詠燊陳詠燊在知專設計學院擔任編劇講師,亦係專欄作家、電影編劇,問到佢點解專寫愛情,他說:「唔想自己寫啲嘢冇主題,愛情我又最鍾意研究,咁咪寫囉!」爆Like王《你估真係咁多港女咩?》潮文勁share 創作人撐:女人付出比男人大港女呢個詞語日日都出現,唔少女仔為咗呢兩個字,受盡困擾,努力改變自己為洗底,《新紮師妹》編劇、創造方鍾Sir呢個字嘅38歲陳詠燊Sunny,最近喺報章專欄為港女發聲,寫 ...


編劇 陳詠燊

陳詠燊在知專設計學院擔任編劇講師,亦係專欄作家、電影編劇,問到佢點解專寫愛情,他說:「唔想自己寫啲嘢冇主題,愛情我又最鍾意研究,咁咪寫囉!」

爆 Like王

《你估真係咁多港女咩?》潮文勁 share 創作人撐:女人付出比男人大

港女呢個詞語日日都出現,唔少女仔為咗呢兩個字,受盡困擾,努力改變自己為洗底,《新紮師妹》編劇、創造方鍾 Sir呢個字嘅 38歲陳詠燊 Sunny,最近喺報章專欄為港女發聲,寫咗篇《你估真係咁多港女咩?》,難得有港男撐港女,唔少絲打都 share兼俾 like,短短一週已經有 5百幾轉發。不過 Sunny話自己都有撐男人:「我成日叫女人唔好諗到男人太複雜,男人喺愛情上好單純。」聽到未呀?絲打們。

F:《 FACE》 陳:陳詠燊

Q1. F:點解會寫一篇為女人發聲嘅文章?

陳詠燊最近喺專欄寫弓一篇為港女發聲的文章,唔少絲打都 share同 like,不過有港男留言,話男人都好慘,陳詠燊:「喺愛情方面男人唔夠女人慘。」(網上圖片)

陳:「港女呢個 term我覺得濫用咗嘅,所以值得探討呢樣嘢。我覺得男人就女人係應該嘅,但𠵱家有時上網睇到啲 post,我見到唔太港女嘅行為,都會俾人話港女,我就覺得不如寫下呢個情況女仔喺愛情入面係慘嘅,因為喺愛情世界入面,女人嘅付出比男人大,男人適當時候就番女人係啱數,呢啲咪風度囉,男人豪俾女人係正常喎。」

Q2. F:點解唔為男人講說話?

陳:「鬥慘永遠冇止境,但愛情世界你冇得講,女人投入度一定高啲,理論上愛情犧牲大啲喎。我有幫男人講說話㗎,成日叫女人唔好諗到男人太複雜,譬如嗌交,男人有時嗌交講嘅說話係咪單打呢?唔睬我,係咪有咩意思呢?其實男人真係好簡單㗎咋,佢唔睬你,只不過諗唔到同你講咩好,真係為咗唔想煩而瞞你,而唔係外面有嘢囉!男人喺愛情上好單純。」

Q3.寫文點先多人 like同 share?

《不要成為男人最想離開的女人》雖然係專欄作品結集成書,但銷量不俗,已經加印到第 4版,新書《我們要錯過多少個以為對的人才知道什麼是對》亦已上市。

陳:我睇得幾透, like唔係一個世界嚟,呢次多人留意,咪睇下留言鬧我咩囉,咪當收下料寫下一篇囉;多人 share當然開心,寫嘢都係想人認同啫,但呢篇爆可能下篇冇人睇呢?有時無心插柳好多人睇,有時好認真反而冇人理。

Q4. F:點先做到愛情專家?

陳詠燊同黃婉曼喺 she.com「男婚女嫁」專欄內,解答讀者愛情問題,陳詠燊:「通常問嘅都係女仔,男嘅最多咪 facebook呻一句囉,好少寫信嚟問。」(網上圖片)

陳:「我覺得冇人有資格教你點做,我只係同你分析你心理狀況應該點面對,我只係疏導你情緒啫,解決問題係你自己。其實大部份寫嚟問愛情問題嘅,都知應該點做,只不過唔捨得去做決定,想揾人認同啫。正如冇人有質格做人生教練,邊個人有資格教人點過人生呢?」

Q5. F:《新紮師妹》版稅得 10蚊美金?

當年《新紮師妹》票房過千萬,方鍾 Sir更加成為經典,後來有荷里活片商睇中,估唔到編劇陳詠燊只分得 10蚊美金。(網上圖片)

陳:「荷里活世界各地都會買啲劇本返嚟,似樣少少都會買。當年佢哋睇中《新紮師妹》,有一日老闆俾咗合約我,話有人俾錢買《新紮師妹》個劇本,要我簽份 agreement,我就收到係一張 10蚊美金嘅支票! 10蚊美金就買斷我嘅版權,嗰陣時覺得點解會咁嘅?但法律上佢哋冇問題,香港編劇從來冇擁有電影,其實我連 10蚊美金都冇得攞!

最好笑係我任職銀行嘅老婆話我知,兌換呢張 10蚊美金支票,手續費係 100蚊。

Q6. F:以前同依家嘅電影編劇待遇有咩唔同?

網上圖片

陳:「其實編劇嘅制度冇咩大改變,都係逐個 project,以前就係一個導演想開戲,揾編劇合作,見一兩次之後寫咗個大綱,導演就攞住個大綱揾老闆,我哋就斗零都冇得收;𠵱家好啲,有機會見老闆,一齊開會,傾下劇本。香港老闆幾好㗎,好少走數。」

攝影:林迅景


鍾意就快D Share啦!