因舌癌而切脷保命的洪朝豐，失去語言能力對他來就如失去「最強武器」，在90年代洪朝豐是廣播界的一代紅人，他主持的節目《日月星辰》，每晚特定環節，當中「性熱線」敏感踩界，話題引人「入性」，吸引不少聽眾捧場，現洪朝豐的聲音已成絕響，其實以「聲」起家的DJ豈止一個洪朝豐，唔少仲因為受聽眾喜愛令他們發展出其他演藝工作，事業大鳴大放，就等東網同大家將曾經或現今仍是廣受歡的DJ逐個捉，回顧一下！
金童玉女
回顧80、90年代DJ可謂最輝煌時代，唔少人都係聽住收音機成長，視DJ為偶像亦是心靈雞湯。講到受學界及少男少女歡迎，黃凱芹和周慧敏非兩人莫屬，當年佢地出現可以話係廣播道上面一對「金童玉女」，俊男美女主持節目叫《二人世界》真係襯到絕。黃凱芹就啱啱大學畢業，第一份工唔係歌手而係走咗去電台做DJ，論外形身高略嫌差少少，但就斯文靚仔夠晒「文青」，當時廣播界好少呢類嘅有墨水又有氣質嘅「小鮮肉」，而周慧敏更加唔使講，清純靚女，佢哋兩個人氣之勁，搞到電台門外日日都有班學生哥學生妹等佢收工，為見佢哋一面。之後，兩個齊齊被寶麗金睇中，入樂壇做歌手，黃凱芹唔只唱得，文采亦一流，做歌手時有填詞寫歌，亦有寫作出書，周慧敏能唱能演，唔只唱《台下女主角》，更係跳埋入大銀幕做電影女主角，封為「玉女獎門人」。
講完黃凱芹亦唔可以漏咗當年另一個紅人陳海琪，因為兩人有一齊主持節目，而海琪當年喺圈中人緣甚廣，主持嘅電台節目《海琪的天空》，經常請到好多巨星老友做嘉賓，閒閒地有張國榮、梅艷芳、羅文上節目家常便飯式傾吓偈，而四大天王、Beyond、草蜢都唔少得，而海琪個性率直，無事不敢言嘅性格，創出佢喺廣播界嘅天空，令聽眾相當受落。
一軟一硬 一凹一凸
由90年代嚟到依家仍然係最受歡迎嘅DJ，冇可能唔數「軟硬」，由葛民輝和林海峰組成，兩個喺電台未合體時，葛民輝係負責報道交通消息，因阿葛自創其輕鬆搞笑式報道手法，創造咗「馬路天使」一角，深受的士大佬一族熱捧，之後，阿葛和林海峰組成「軟硬天師」，性格一軟一硬，一凹一凸，佢哋節目風格亦別樹一格，當中「老人院時間」節目入面，兩人扮聲扮怪打電話整蠱人嘅「整蠱電話」最為經典，至今仍喺網絡流傳不時被人拎嚟翻炒重溫。因為佢哋讀設計出身，潮流觸覺梗係快人一步，佢哋身上着嘅衫穿嘅鞋用嘅袋，都成為唔少年青一代追捧指標，成為潮流Icon。
同你解決感情煩惱
09年代好流行訴心聲節目，其中不能不提就係顏聯武，唯佢獨專嘅沉厚的聲線，好似磁石咁吸引唔少聽眾收聽，佢最出名的一句開場白：「朋友，你寂寞嗎？」令唔少收收埋埋好多冤屈、情傷未愈、各種困擾嘅人，都打上節目搵顏聯武幫佢解決心中疑難。而顏聯武選播嘅歌都有憑歌寄意之效，令大家心靈上得到唔少慰藉。訴心聲節目男DJ有顏聯武，女嘅就唔少得白韻琹，佢嘅「白姐姐腔」相信有聽過佢節目嘅人都唔會忘記，亦善長幫聽眾解決情困，不過好多時都鼓勵人分手同離婚而惹嚟唔少非議。
音樂情人 冧鬼死人
而近十年鄭子誠亦憑佢嘅雄厚聲線，在廣播界成功霸山頭，佢演戲演奸角，可以奸到盡、入晒骨，竟然惹嚟唔少網民鍾愛，封佢係完美奸人，而呢位奸人誠變身做DJ，用佢攝人嘅聲線，加上佢善長選播70、80、90年代嘅廣東歌，每次節目開始鄭子誠都有一段開場白，以後最尾一句：「我係鄭子誠，你可以叫我音樂情人。」佢嘅感性一面冧暈唔少聽眾。
殺入公仔箱
要講到90後最受歡迎嘅DJ都應該非森美小儀莫屬，兩位所主持嘅節目題材夠貼地，亦食中年輕一輩嘅鍾意嘅話題。做DJ最緊要轉數夠快，而森美同小儀唔使講轉數快之餘，仲以幽默同mean爆嘅方式主持節目，森美經常寸爆小儀就好似鬥氣冤家咁，加上兩人一高一矮，形象搞笑，成功俘虜一班固定聽眾。除此之外，森美就讀喇沙書院同香港中文大學，亦推出過唔少書籍同寫專欄，喺2001年被選為「18-24歲最受歡迎DJ」嘅榮譽，最近更拍劇兼練大隻，形象入屋，吸引了大批唔同年齡層嘅粉絲追捧。而小儀雖然經常被森美取笑高度，但兩人依然合作無間。當小儀2009年喺節目《美女廚房》中奪冠後，參與唔少飲食節目同拍攝劇集，還推出過書籍同埋參與舞台劇等幕前工作。最近小儀喺劇集《降魔的》嘅演出非常感人，令觀眾留下深刻印象，成功以演技贏得民心。
除咗森美小儀之外，90後喜愛嘅DJ仲有艾粒。艾粒係由少爺占同當奴組成嘅搞笑二人組合，專門諷刺娛樂圈時弊，兩人以無厘頭同搞笑嘅風格成功吸引到大批聽眾。其後兩人亦參與過唔少題材相新穎嘅電視節目，當中令大家最回味嘅一定係《阿笨與阿占》，兩人仲喺2005年以組合身份踩入樂壇推出專輯同舉行演唱會加talk騷。就讀香港理工大學設計系嘅少爺占其實早喺Year 2嘅時候已經加入電台工作，還創作多個以青春為主題嘅廣播劇，全部都被編成書籍同漫畫，喺書展入面係最暢銷作家之一。而喜歡靈異題材嘅當奴以搞笑方式創作咗靈異為主題嘅廣播劇，隨後同雲海主持靈異節目，吸納到喜歡受聽靈異事件嘅觀眾。
靈異節目勁啱Feel
能夠成為受歡迎嘅DJ未必需要靠樣或者靠把聲，靈異節目都造就出唔少「鬼王」DJ，雷宇揚係出身90年代第一代「鬼王」，喺夜欄人靜嘅時間，揸緊車嘅司機、當夜更嘅看更、寫字樓趕緊OT嘅人或者匿喺被竇嘅人，大家抱住又驚又想聽嘅矛盾心情去聽鬼故，而當年雷宇揚喺節目到分享唔少親身經歷，聽聽埋埋圈中藝人嘅靈異故事，成為當時得令嘅王牌節目，因為「鬼王」形象深入民心，之後雷宇揚仲拍咗一系列「陰陽路」嘅電影作品，成為香港恐怖鬼片的代表。而近代的「鬼王」就有潘紹聰和路芙嚟成功接棒。
|
鍾意就快D Share啦！
|
|
|
