42歲萬人迷碧咸（David Beckham）不但令淑女瘋狂，連83歲「龍婆」羅蘭也一樣嗒糖。羅蘭日前非常巴閉，到澳門與碧咸演出金沙集團廣告，她興奮得像小fans要求碧咸合照簽名，難得這位萬人迷不但攬着羅蘭合照，還將照片放上Instagram。首次與外國人合作便遇上巨星的羅蘭昨日說：「佢好靚仔，完全冇架子！」還透露遭導演叫她以龍婆形象拍了幾場戲。
萬人迷碧咸日前殺到澳門，原來是為了金沙集團旗下酒店拍攝廣告。碧咸昨日在自己Instagram上載連日來的拍攝花絮照片，並留言說：「晚上在澳門拍攝，結交了新朋友。」在碧咸上載的多張照片中，包括澳門名勝觀音像和天主堂，以及澳門特色萄撻和小店等，但最矚目的是當中竟然有他與羅蘭的合照。其中一張是碧咸攬着羅蘭，羅蘭還邊笑邊豎起手指公讚好，另外又有碧咸與一班熟女大合照，認真令人羨慕。
「冇鬚仲靚仔」
記者昨日致電羅蘭，問是否與碧咸在澳門合作拍廣告時，羅蘭反問記者為何知道她與碧咸合照，當她獲悉是碧咸主動將攬攬相放上社交網後，羅蘭即開心地說：「我都係啱啱喺澳門搭船返到香港，我同佢拍金沙集團嘅廣告，我第一次同外國人拍嘢，估唔到第一次就同個咁大粒喎，我都好開心興奮㗎！」
羅蘭大讚碧咸好靚仔，她說：「我睇番佢以前啲相，覺得佢冇鬚嗰陣仲靚仔㖭！我叫佢同我影張相簽個名，佢即刻話冇問題，好親切，好nice，完全冇架子。」那麼碧咸是否知道她是演員？羅蘭笑說：「佢知，連個外國導演都知，有幾個shot個導演仲叫我扮龍婆㖭呀！」
| | | |
請食葡撻結緣
對於今次廣告內容，羅蘭說：「個古仔係講碧咸喺澳門條街度俾啲壞人同記者追，我見到就叫佢匿入我間屋度避，仲請佢食葡撻㖭，跟住同佢熟咗。事隔十幾年之後，佢再去澳門，想食葡撻，但食唔番以前我整嗰啲味道。佢一路想搵番我，但搵唔到，後來佢搵到我揸的士個孫仔，孫仔就帶佢去我屋企搵我，我同佢講我開咗間葡撻嘅舖頭喺商場，跟住我就帶佢去我舖頭食葡撻囉。」
問到拍攝是否順利？羅蘭說：「好順利呀，我24號過澳門拍咗三日，今日先返香港，原本以為拍外景時會落雨，點知天公造美冇落雨，拍攝過程亦好順利，大家冇乜NG，原本我哋預計噚晚要通宵，點知拍到凌晨兩點已經搞掂。」問酬勞是否可觀？她說：「冇乜特別，都係平常收嗰啲。」
採訪：魯吉
|
鍾意就快D Share啦！
|
|
|
