阿嬌同賴弘國於香港時間今日凌晨五時在洛杉磯舉行婚禮，據在場賓客形容，阿嬌由頭喊到尾，但最先第一個喊嘅，竟然係賴弘國，搞到阿嬌都忍唔住喊，阿Sa、祖兒、Mani個個都變晒喊包……
禮成之後，賓客亦陸續離開。大住肚都飛抵當地出席婚禮嘅蔡一鳳，拖實老公盛品儒離開。問兩人方才婚禮上嘅情況，盛品儒話一對新人講咗啲好溫馨嘅說話啦：「Part part都好感人，一開始已經好感人。」蔡一鳳就話：「譬如話好唔容易行到今日啦…」盛品儒就補充謂：「佢哋係兩個唔同地方嘅人，唔同背景、文化。」兩人都話聽到一對新人嘅致詞時，都眼濕濕非常感動。
蔡一鳳又話：「成個婚宴好溫馨，阿嬌真心想朋友分享佢喜悦，我feel到。」蔡一鳳都祝福阿嬌早生貴子。
問到蔡一鳳送咗乜嘢禮物，佢話設計咗一套獨一無二足金首飾送新娘子。蔡一鳳其後把禮物相po出後留言：「最特別的禮物送給最特別的你。要一直幸福下去。讓我心意伴你左右。穿上龍鳳袍襯上一定獨一無二！因為這是我自構思了好幾個夜晚的設計出品，親自監工生產，好開心趕在今日贈上。」
來源 source: http://hk.entertainment.appledaily.com
|
鍾意就快D Share啦！
|
|
|
