已有18年歷史的旺角行人專用區，隨着前日油尖旺區議會大比數支持下終告結束，預料4個月後正式殺街。旺角行人專用區曾是男子組合C AllStar和龍小菌等歌手成長地，龍小菌7年前更以蒙面歌手造型在旺角街道獻唱，就連「除罩」也是在同一地方。對於殺街，龍小菌昨說：「好可惜冇咗呢個街頭文化。」
曾孕育不少藝人歌手的旺角西洋菜街行人專用區，近年已變成大媽舞台，由於噪音問題越演越烈，油尖旺區議會前日開會討論「研究撤銷旺角行人專用區議案」，結果以16票大比數通過，預料4個月後正式殺街。
龍小菌7年前開始以蒙面歌手造型在旺角街頭獻唱，原為中學教師的她因不想影響工作，及希望觀眾可以用心去聽音樂，不會只注重外表，所以才以蒙面造型出現。直至13年6月，龍小菌在旺角街頭「除罩」以真面目示人，始發現她是貌似苟芸慧的美女，可惜同年12月，龍小菌在旺角街頭與香港聾人協進會報佳音，被賣藝團體出言侮辱，之後龍小菌亦絕迹旺角行人專用區。
| | |
望能管制表演
對於旺角行人專用區殺街在即，龍小菌昨說：「好可惜冇咗呢個街頭文化，亦希望香港能有一套完善嘅街頭藝人發牌制度，其實好多國家，如台灣、日本都實行緊呢樣嘢，畀空間一啲想透過街頭表演搵滿足感嘅朋友。我相信街頭某啲地方係適合表演嘅，但需要有一個管制，好似喇叭幾大聲或表演係乜，應該有一個guideline去做管制，講就易，去執行可能需要一段長時間。我嘅意見應參考鄰近地區做法，盡量去保持呢個街頭文化。」提到旺角街頭的變化，龍小菌表示：「之前條街要早啲去搵位，要先到先得，嗰個時候冇咁多大媽。」
男子組合C AllStar出道時亦曾在旺角街頭表演，對於殺街，C AllStar前晚於facebook留言：「這片曾經孕育我們出來的樂土，幾年後只見到群鶯亂舞，如今更已成為焦土。」成員之一的梁釗峰昨日受訪時則說：「2010年我哋從北京完成MV返港後，因為嘗試過喺街頭演唱效果不錯，監製亞簡決定叫我哋喺香港街頭唱歌，一來宣傳歌曲，二來磨練自己。我哋揀咗西洋菜街，因為嗰度人流多，地點適中。嗰陣表演多元化，只要你有閒情走過，總有一款可以令你留低駐足。」
不熟悉的文化
釗峰續說：「七年間我哋都成長咗，行人專用區亦變成一個我們不熟悉嘅異域，唱跳一啲我哋唔熟悉嘅文化，表現我哋唔熟悉嘅風情。呢片曾經嘅樂土就似我哋母親，用咗十四個星期孕育我哋，我哋生於斯，長於斯。如今被殺，的確可以換來一刻嘅安寧，但被殺嘅仲有香港本土街頭文化，究竟喺呢度，我哋仲還剩低啲乜？」
採訪：陳杰、何永寧
|
鍾意就快D Share啦！
|
|
|
