從86年劉德華拍《肝膽相照》時開始認識他，感覺上劉華是工作好勤奮、認真和執着，對私隱極度保護的人。他很有義氣，曾對他有恩的人拍膊頭想請拍戲，明知收很少片酬，他都沒有拒絕！其實劉華是很有善心，記得當年杜琪峯和周潤發想以藝進同學會名義幫一間老人院，當時阿杜提議拍一部片來籌款，想請發哥、劉華和某某3位當時得令紅星不收分文主演，發哥和劉華都好爽快答應了，唯獨某某拒絕了，後來這部戲也沒法搞下去。當時我曾問過某某為何不肯拍這部戲？他反問：「點解要我免費拍，我豉油撈飯嘅日子，又有邊個幫過我！」
同是巨星級，劉華相對地肯做善事，話說90年代，麥潔文找我幫忙，指某間老人院欠一筆經費，後來我問向華勝有沒有電影可以做慈善首映，幫這間老人院籌款，向生就好爽快答應幫忙：「我攞《龍過雞年》幫老人院籌款我公司包一半飛，其餘一半你哋自己去搵人賣定價1,000蚊蚊一張。」結果我與幾位記者行家幫麥潔文搵了發哥、張敏、邱淑貞、關之琳、梅艷芳與黎明等明星，推銷餘下的500張慈善首映戲票。
當中劉華是最豪爽一個，他買了共50張，但他只取了6張給家人睇戲，其餘戲票他再捐出來義賣；之後隔了幾天，我約了一位與劉華同級的男影星晚飯，問他可否買2張慈善戲票？因為他平時都是好知慳識儉，所以我只是開口叫他買2張，怎知他答得更妙：「我幫你買一張支持吓你！」我說：「吓！你買一張，畀屋企人或送畀朋友都冇理由送一張吖嘛！買夠2張」他說：「我都冇乜朋友，買一張得」做慈善是隨心，所以沒有再勉強他！
後來僅賣剩8張戲票時，我剛巧在一個片場見到黎明，本來是問他能否買4張慈善戲票？結果他反問：「賣剩幾多？不如我買晒去」我是有些出乎意料，告訴他：「仲有8張，1,000蚊1張！」當時Leon拿銀包付錢時，發現自己現金只有5,000蚊左右，我提議他買4張就可以了，怎料他說：「我話咗買晒呢8張就8張，你等我一陣，我會搞得掂！」結果他問助理和梳化服人員東湊西湊，真的湊夠8,000元。
劉德華在演藝圈多年，特別重視個人形象，緋聞極少，但其實四大天王於90年代當打時期，不少女星都對劉華好感興趣，記得90年代就在片場聽過一位梳頭阿姐爆料，她們天天與明星們混在一起工作，知道的秘密最多，聽她講起劉華一些八卦，也是讚他定力夠：「華仔同某某女星有晚拍完戲收工，華仔一向係自己揸車走，嗰位女星自己有保母車接送，嗰晚女星一見華仔上咗車，就跳咗上華仔部車度，仲坐喺司機隔鄰個位，當時我哋望到華仔個樣係好愕然同無奈！其實喺現場都feel到個女嘅對男嘅有意思我哋咪睇到華仔焗住車女星返屋企囉！」
可能大家會問，女星咁主動出擊，之後會唔會有下文呢？因為這位紅女星有樣有身材，又夠主動，難怪影圈中「吃」過不少俊男，成為圈中出名的集郵專家，經常在收工後以壞車、司機有事請假為由，要求男對手送她回家，然後在車上主動勾搭一下對方，如果有反應就自然有下文如果不受她這套，就各自返歸。聽梳頭阿姐講：「我試探過個女嘅，佢話華仔對佢真係冇乜興趣，話嗰晚送完佢返屋企就雞咁腳走，之後睇到華仔對佢係避忌咗！反而佢同期拍另一部戲嘅對手就俾佢集郵成功，嗰個都係好紅㗎，但受唔住引誘所以橋唔怕舊，最緊要受。」
印象中香港影星就只有劉華要求電影合約訂明要擁有最後剪接權，我聽好多導演說過好反感演員要這權力，因為他們覺得演員只會偏重自己部份，不是以一部片的整體利益出發。2年幾前一個飯局中，我曾經問過他：「其實你點解咁堅持要有最後剪接權，咁做可能會令你少咗機會同一啲好導演合作？」劉華回：「你有冇睇《寒戰》呀！《寒戰》咪用咗我剪個版本上映，你覺得有冇問題呀！我一定係為部戲出發去剪，其實我合約訂明有呢個權利，唔代表我一定用，只係一種保障。」
認不認同他應該擁有最後剪接權都好，但不可否認劉華對香港電影是有心人，肯定有作出貢獻，當年他成立天幕公司，也賠過不少錢，當年我曾經勸過他蝕了這麼多錢，不如把電影公司結束止血，專心做演員，但他還是堅持經營下去，縱使成立的電影公司到現在沒輸錢已偷笑，他還是好用心去經營，好支持拍本地片及栽培過不少電影新血出來。
白露眉
本欄逢周日刊出
----------
作者介紹：白露眉，縱橫娛樂圈35年的資深記者，看盡圈中人情冷暖；這年頭，地球病了，娛樂圈轉慢了，白露眉是時候出手了，每周日在《蘋果》分享【非常人•非常事】，跟「蘋民」圍爐取暖。
-----------------------------
App內1-Click訂閱《蘋果動新聞》
按此了解更多
來源 source: http://hk.appledaily.com
|
鍾意就快D Share啦！
|
|
|
