商台DJ麻利在社交網站出post，希望大家留意廣東話咬字問題，誰知卻惹來姜濤fans對號入座，留言叫麻利不要再單打「小朋友」姜濤，更直言就算姜濤咬字唔正亦可以好紅。而一眾網民看到後，紛紛留言撐麻利，更拿出同是21歲時的陳奕迅與姜濤做比較。
有網民看到姜糖的留言後，在討論區出post直指現時有很多新人的廣東話咬字有問題，有網民看完後直言自己第一個聯想到姜濤：「佢都算係新一代歌手入面聽完佢啲廣東話咬字會令我打冷震嘅一個歌手。」之後其他網民紛紛留言，表示麻利亦曾被批評過咬字不正，但最少她概念跟思想正確：「身為下一代嘅榜樣，咬字不正真係會影響下一代，廣東話係香港人最後一樣唔可以輸嘅嘢」、「咬字唔好有問題喎，用『他只是個孩子』嚟擋，成段嘢小朋友發脾氣咁」、「我諗就算係普通人都要咬字清晰，廣東話係母語嚟」更有人反問：「懶音定鄉音，兩樣嘢嚟。」亦有人批評他唱謝安琪《我們的基因》時，咬字不正兼唔啱音：「姜濤唱《我們的基因》簡直係災難級，字咬唔正、音唔準，把聲又唔夾首歌。」
提到姜糖指姜濤是「小朋友」，網民的反應亦非常大，直言姜濤已經21歲，更有人貼出同是21歲的陳奕迅參加新秀時唱《真的愛你》片段，來與姜濤昨晚在東華的演出做比較：「人哋（陳奕迅）都係21歲，人哋個陣係比賽仲要未出道，呢個小朋友（姜濤）出咗道添啦，已經讓咗賽。」、「咬字唔正又唔好聽咪有問題，你係好聽，唱到唸經咁都無問題啦。」但亦有網民非常中肯地，拿姜濤與同樣被批評過唱歌時發音不正的周杰倫作分析，指當初周杰倫的唱法也是引起爭辯：「睇返歌詞起碼知道佢冇唱錯，因為得四個音，唔會偏得太離譜……廣東話有九個音，咬字唔清晰係令表演立即有明顯突兀嘅感覺。（姜濤）聲底唔係好，唱功又未掂。唔覺得麻利有講錯啲咩，最多話佢寸，自己做dj都不時有懶音出現。」
-----------------------------
App內1-Click訂閱《蘋果動新聞》
按此了解更多
來源 source: http://hk.appledaily.com
|
鍾意就快D Share啦！
|
|
|
