蔡思韵（Cecilia）憑周冠威導演的電影《幻愛》獲今屆金像獎最佳女主角提名。戲中一人分飾兩個角色，一個性格堅毅滿有機心，另一個是溫柔婉約的鄰家女孩，性格迥異，她笑言應該有兩個提名︰「戲入面演兩個角色，性格都好唔同，演緊兩個唔同層次、唔同個性，表裏不一。有一場情緒爆發嘅戲，為咗重現情緒高度，要一鏡到底。前後總共NG咗廿幾次，不斷NG每次都要重現返情緒高度，有啲難。最難唔係普通嗌交，好憎你趕你走，係好憎自己，憎到想傷害自己，20幾個takes都係咁，精神同肉體上嘅攰，好似喪屍咁。呢場戲完成之後，要即返屋企瞓覺。」
作為新人第一次參加金像獎，可惜實體頒獎禮因為疫情而要39年來首次停辦，失望是預期之內，她說︰「當然有失望，期望自己着得好靚行紅地毯，有現場觀眾可以感受到氣氛。不過喺疫情下當然會理解。」Cecilia幻想上台攞獎講感言時，一定會喊︰「首先要扮鎮定，攞獎真係會喊。會多謝喺大大小小嘅事情上幫助我嘅人。」香港觀眾因為ViuTV劇集《短暫的婚姻》開始認識Cecilia，去年她在台灣電影《返校》中演老師，再到今年《幻愛》分飾兩角，兩齣電影的分別在於戲份，她說︰「《幻愛》可以畀更多朋友認識我之餘，可以睇到我嘅表演。始終擔任主角，會有多啲戲份同發揮。」
電影業正處於冬眠期，Cecilia往好方面想，未覺是最壞時代︰「以前電影最黃金時代，主角都要畀大明星。作為新演員，可以喺《幻愛》做到女主角咁有發揮，就係因為呢個時代，先有呢啲機會。心目中嘅大明星會係周迅、張曼玉、舒淇、章子怡，唔一定好典型靚女，要喺電影有一種吸引力，當然係佢哋表演令我好感動。」男朋友兼《幻愛》男主角劉俊謙獲提名新演員，導演周冠威獲提名最佳導演，夾在中間的Cecilia笑言最理想是雙贏，假如要二取其一，她會「幫理不幫親」偏心導演攞獎，她解釋︰「導演係一部作品嘅頭，所有嘢都關佢事，作為演員都係導演帶領，就算我同劉俊謙表現俾人讚賞，都係導演功勞，所以會揀導演。」
最佳女主角入圍名單︰
蔡思韵《幻愛》
鄭秀文《花椒之味》
鄭秀文《聖荷西謀殺案》
周冬雨《少年的你》
鄧麗欣《金都》
採訪︰何永寧
攝影︰沈健程
梳頭︰Lupuschui@orient4
化妝︰ShuenKong@WiLLWong
服裝提供︰Versace & Fendi
-----------------------------
App內1-Click訂閱《蘋果動新聞》
按此了解更多
來源 source: http://hk.appledaily.com
|
鍾意就快D Share啦！
|
|
|