熱刺喺周二(7號)英超重響勝鼓，主場靠愛華頓中堅米克堅尼一個烏龍波，以1比0小勝全取3分，升上聯賽榜第8位。不過今場最大話題，就係熱刺半場期間上演球員內訌，隊長洛里斯狂奔至中場追住孫興民破口大罵，孫興民亦激動反擊，最後要隊友將佢哋分開。
熱刺早段已經領先1球，但完半場前因為孫興民「偷懶」冇追李察利臣，畀對手出現危險埋門機會，當球證吹雞後，門將洛里斯就衝去喪鬧孫興民，並且出手推咗佢一下，孫興民亦都反應激烈想反擊，好在哈利雲克斯、施素高等隊友及時制止。
雖然出現肉酸「鬼打鬼」場面，不過領隊摩連奴就話係好事：「我覺得好正，如果要搵人鬧就鬧我，係我要求所有球員對自己同隊友有更高要求、畀更多壓力隊友，有時鬧幾句可以令球隊成長，所以半場返到更衣室我係非常開心。」主角之一洛里斯賽後亦淡化事件：「呢啲事足球場上經常發生，我同孫興民冇任何不和，賽後我哋都好開心可以拎晒3分。」
來源 source: http://hk.on.cc
|
鍾意就快D Share啦！
|
|
|