少女情懷總是詩，51歲的伍詠薇至今仍然回味中學時代的初戀。
出世便住西環觀龍樓的伍姑娘，尤其對由蒲飛路總站開出到北角碼頭的23號巴士特別有感情。因為她的Puppy Love就發生在這個巴士總站，當年未夠11歲升中一的伍姑娘就讀聖瑪加利女書院，朝朝坐這架巴士返學，中一下學期，伍姑娘在巴士站被一名年長3歲的聖貞德男生深深吸引着，「佢好靚仔，好似近藤真彥，真係驚為天人，佢有梁朝偉嘅大眼，佢令我朝朝有返學嘅動力，永遠唔會遲到，見到佢我會心跳加速，係我單方面暗戀人，當時大家唔認識，成個學期大家一齊搭巴士返學，排隊又爭幾個身位，開頭係我唔停咁望佢，最初只係望實佢背影，之後開始互望，佢眼神接觸到我時，我立即耷低頭，如是者都維持咗1年，大家應該有好感，但都係冇傾偈。上到巴士，我有時坐倒頭位，坐正喺佢對面，中二時有一日，佢同我講早晨，我心卜卜跳，一生人從未有嗰個感覺，真係開心到跳起，當年又開始播《荳芽夢》，跟住我哋又交換咗屋企電話，因為我係讀女校，所以晚上要企喺電話邊等佢打嚟，如果哥哥接到電話會鬧我。」
如是者，11歲的伍姑娘人細鬼大開始了初戀故事，她稱呼對方做「黃同學」，當年他們拍拖非常純真，大家肩並肩同行已有觸電感覺，她會陪男友去篤波，40年前的一個周六下午，兩小無猜趁不用返學去拍拖，「黃同學」如是者送伍姑娘返觀龍樓家，他們途經一個公園，熱戀小情侶依依不捨，「因為周日唔返學見唔到，佢走埋嚟錫咗我一啖，我都唔記得佢錫我塊面定係個嘴，嗰一啖我好驚，俾自己鍾意嘅人錫落嚟，我嚟唔切反應就轉身跑返屋企，閂埋木門，我仲係咁喘氣，好似鬼上身咁，好記得12歲幾嘅初吻好難忘。」伍姑娘訪問當天還帶記者時光倒流40年，不但重返23號巴士總站，還去到被奪去初吻的公園緬懷一番，伍姑娘禁不住嘴角含春，重現少女情懷。
「黃同學」其後轉校，兩人的戀情由濃變淡，「其實都唔知我哋係咪算拍拖，大家冇話有正式關係，佢都受女生歡迎，對我都忽冷忽熱，佢成日好似好多心事咁，佢越憂鬱，我就越鍾意佢。我當年又唔算好靚，孖辮妹，好多汗毛，到個男仔讀完中五後出咗嚟做嘢，我哋越見越少，我都懷疑佢另有女朋友，大家關係無疾而終，不過呢個男仔之後好差。」
伍姑娘中學畢業後找到文職工作，後被發掘參選1989年的亞洲小姐競選，雖然三甲不入，卻意外加入娛樂圈，並釣得金龜婿翁江培，新婚13日，翁江培突然心臟病發在深圳離世。伍姑娘重新振作在娛圈工作，沒想到卻在這個時間重遇上初戀男友「黃同學」，「以前亞視舊廠化妝間有個電話，咁啱有一日我就接到佢打嚟搵我，嗰時我發生咗事故，自己心情有啲失意，同個Puppy Love相遇番，佢叫我出嚟飲杯嘢，我係雙魚座，好易動心，大家中間有段撲朔迷離關係，咁大家係大人都唔使講。上天對我不薄，冇耐我接到電話，有人向我提水講個男仔啲企圖，我聽完臉色都變晒，我就趕咗個男仔走，咁就正式結束咗呢段巴士情緣。」
問到伍姑娘可憎恨「黃同學」？她平靜說：「佢傻仔囉，23號巴士站同呢個人真係我中學時代一個好緊要嘅關係，自己suffer當中，唔憎呢個人，憎一個人好辛苦，當時我係好嬲，好激氣，點解你要咁呃我，男仔、女仔俾人呃，那怕異性大整蠱，係個天畀我考驗，上天睇唔過眼要踢爆佢，或者我當年遇到高手，到我今日就變（情場）高手。」
伍姑娘自爆少女時經常主動出擊追仔，她說：「細個愛情故事，我追男仔多，我真係好姣㗎，我已冇乜揀，但追方面濫，見到男仔靚，我會不停望，而家人大咗收斂咗，我始終係一個大人，我本身好鍾意睇靚嘢，包埋男仔女仔，異性對我特別吸睛。」這天，伍姑娘路過觀龍樓附近的球場，中女仍然瘋狂攀網望男仔。伍姑娘直認那些年課外活動，最愛周末周日到尖沙嘴海旁睇靚仔，「中學時，周六周日會約埋幾個女仔去尖沙嘴海旁睇靚仔，媽咪唔畀去㗎，我趁阿哥去補習，阿媽入咗廁所準備返工，我靜靜雞偷走出去，打罵乜都有，但睇男仔大過天，重要過讀書返學，睇仔係重要課外活動，都好純潔，我嘅中學生涯就係咁白白癡癡度過。」
撰文：比華利
攝錄：廖達燊、陳慧安
髮型：Debby Kwan @HAiR
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|