赤膊的洗米華，陪透視晒腿 Mandy，戴埋情侶眼鏡情侶帽！
娛頭
新年見阿爺 八個月 B女認祖歸宗 洗米華 Mandy全家豪遊布吉
去年 12月，周焯華（洗米華）同由英國回港的 Mandy Lieu，即晚上演世紀一拖後，洗米嫂宣布投降，拉鋸一年半的「搶米戰」終於分出勝負， Mandy Lieu大獲全勝！回復自由身的洗米華，更加一心一意獨愛 Mandy，全副精神照顧兩母女。日前一家三口去布吉家庭樂，洗米華父愛氾濫，全程抱實 B女唔放。八個月大的 B女好足秤，手長腳長，樣似爸爸，得對眼似媽咪，有 mix味道。
據知，洗米爸已經開到口，要見孫女。今個新春， Mandy將會抱埋囡囡同爺爺拜年，正式入宮。
似老豆多啲
洗米華同 Mandy行埋兩年，至今仍然熱情如火！今次一家三口陽光海灘之旅，二人亦爭取拍拖時間。人在外地無束縛，十指緊扣行商場，一杯雪糕兩份食，仲時不時肉緊嘴嘴，痴纏到呢！
週日（一月三十一日）， Mandy和洗米華帶埋 B女，同行還有一名幫手湊 B的 Mandy親戚，一行四人從英國出發飛曼谷，再轉早機去布吉。
泰國港人多，為免 B女被曝光，洗米華時不時兩頭望好警覺，又經常將 B女塊面緊貼自己心口，仲校到最後一秒才到閘口登機，全程抱實 B女的他，一副冧樣。
八個多月的 B女，著住藍白間條衫，伏在爸爸膊頭，人仔細細，但手長腳長，頭髮短短，面貌似爸爸多啲，只得對眼似 Mandy，有輕微混血兒 feel。臨入閘， B女突然扭計放聲爆喊，平日 cool爆的洗米華暫時放低 chok樣，同 Mandy一齊做鬼臉扮 cute氹女， B女瞬間笑番又郁身郁勢，一家三口勁溫馨。
去到布吉，一行人仍未有鬆懈，急急腳走入 VIP房等行李，就由另一個出口離開機場，直接到奧波碼頭（ Ao Po Grand Marina）上遊艇，展開海上之旅。
透視晒腿
翌日，洗米華同 Mandy將囡囡交託親戚照顧，享受二人世界。中午十二點，二人坐駁艇返回碼頭；上落時，洗米華當 Mandy公主一樣，伸晒手接駕。
著住超短褲晒四十二吋長腿的 Mandy，上身配 see-through吊帶低胸裙，打底泳衣若隱若現，又露出全個白滑玉背，非常吸睛；雖然已經生過，但身材比做 model時期更 fit。至於洗米華亦唔輸蝕，短褲踢拖，打大赤肋晒朱古力肌，仲同 Mandy戴住情侶超情侶帽，簡直襯到有點過火！
二人上車離開碼頭，到 Central Festival Phuket Shopping Mall。到埗煙癮起，一向唔請 Mandy食二手煙的洗米華先跳落車，行去車尾扯煙， Mandy就留在車上等。之後 Mandy落車，洗米華又第一時間上前護住，再一齊搭電梯上商場。
洗米華好餓
囡囡不在身邊，洗米華和 Mandy輕鬆拖住手， fing吓 fing吓行商埸，就算身邊時不時有香港人經過眼望望，洗米華頂多露出唔多友善嘅眼神，但一於少理。二人先去果汁店買了杯果汁，你一啖我一啖兩份飲。飲完果汁再搵地方坐低醫肚，雖然商場內滿布高級餐廳，但二人卻選擇到 food court，排隊食 KFC。沿途上，肉緊攬到實一實的洗米華，又不時用手捽住 Mandy的玉背，可能太餓的關係，見他突然一啖噬向女友面珠，搞到 Mandy勁冧。
佗 B生埋都好似冇事發生的 Mandy勁好胃口，大啖大啖食，又將炸雞餵入男友口，煙韌爆。食完繼續又攬又拖在商場閒逛，並買了大袋體育用品。行了個半鐘， Mandy又嗌肚餓，走入甜品鋪再食過。之後二人轉場下一站，一到埗又坐低食！食完在市集漫無目的行，逗留約個多小時，上車離開。
正式入宮
世紀一拖後，洗米嫂單方面公告天下搞緊離婚，洗米華回復自由，唔使再分身，順理成章全天候陪實 Mandy母女；更搵定大屋，待離婚手續正式辦妥後，接埋 Mandy母女一家三口生活。
據知，洗米華家人開始接受確認「新阿嫂」地位，仲開到口要見 Mandy同 B女。布吉之旅後緊接農曆新年，屆時 Mandy就會正式入宮，帶埋囡囡同男友家人拜年見面。
「個女出世半年有多，都未見過爺爺，阿爺話想見吓粒孫，所以去完布吉，佢哋就帶個女返去見爺爺兼拜年。」知情者說。
遊艇天堂
有「富豪遊艇天堂」之稱的 Ao Po Grand Marina， 08年落成，位於布吉市北面，與布吉機場距離只有十五分鐘車程，交通方便，鄰近布吉島主要的度假勝地，如 PP島及攀牙灣等，是當地唯一一個廿四小時供遊艇停泊的地方，有二百個遊艇泊位，至於租艇費用由每日約一萬至十萬不等，視乎遊艇大小，遊艇會有廚房及服務員，準備一日三餐。
Ao Po Grand Marina私隱度高，保安森嚴，一般遊客不能隨便入內參觀，附近還有高級餐廳，及距離五分鐘車程的 Chandaua水療度假村。
12年，前行政長官曾蔭權亦曾到此，玩法跟洗米華相近，曾蔭權在富豪遊艇上歡度四日三夜，連日接受富豪級款待，事後被人懷疑質問。
得力助手
錢多女又多的洗米華，早前傳出他趁 Mandy在英國湊女，搭上助手李素茵（ Gina）。其實 Gina本身來頭不小，身兼太陽城集團公關部副總裁外，還是澳門娛樂展覽委員會主席及勵志青年會理事長，據知她已婚，與 Mandy分屬好友，去年 Mandy在英國生女， Gina亦有陪伴左右幫手打點，是洗米華身邊多年得力助手，而非新歡。
解放勝地
想著少布啲同陽光玩遊戲，名人明星都愛選擇水清沙幼又多細島的布吉，可以無拘無束，大解放！
撰文、攝影、攝錄：娛樂組
|
鍾意就快D Share啦！
|
|
|
