今年 73歲的夏雨，對於一把年紀創業搞電影，充滿信心。
探熱針
掟錢拍港產片 夏雨：我係唔化！
上月剛過了 73歲生日的夏雨，年前同港視拍完劇集《歲月樓情》後已回復自由身，跟住有幾套內地劇敲門，原本可穩袋七位數的他卻嫌戲份少，冇發揮，全推！有錢唔賺反而掟錢同人合資開電影公司，搞本地製作。
被網友呼籲杯葛的王晶曾寸嘴話：「香港票房係內地廿五分之一，你話我擔唔擔心？」純港片保本難是鐵一般事實，但七旬夏雨仍然雄心壯志，自信能再闖另一片天空，「我認，我係唔化！」
老當益壯
眼前的夏雨，問題未問完先搶答，行路似電兔，點睇都不似七十三歲。年前同鮑起靜拍完港視劇《歲月樓情》後，夏雨一直無停過，拍劇又拍電影，反而最多藝人視如金礦的大陸劇，一套都冇接過。
「我推咗兩三部冇做，（戲份）唔係重得咁交關，可能四十集入面得十集八集，我覺得到我呢個年紀，唔使一定做呢啲。」夏雨說。
接 job有原則，碰啱合作多年的製作人搵上門，要求夏雨做盲公竹，幫手在香港開電影公司，加上拍完港台劇集《獅子山下——鬼收樓》，促使夏雨決定高齡創業。
「我自己睇番（港台劇），冇跌 watt，冇唔記得對白，冇體力問題，但拍出嚟我真係老啦，忽然有啲咁嘅感覺，咁啱有呢個機會（合資開電影公司）咪轉吓囉，又唔代表我唔拍劇嘅。」
頭炮拍殭屍
夏雨的新公司叫 mm2，辦公室設在九龍灣，成立只有大半年，落實今年開拍三部電影，食住近年再興起的殭屍熱，頭炮是《救殭清道夫》，用新演員，希望可在六百萬預算內搞掂；但星馬投資方有意見，怕全新人冇卡士影響賣埠，於是加碼至九百萬，終於搵來錢小豪、邵音音同 BabyJohn（蔡瀚億）孭飛。
「九十年代殭屍片，錢小豪、音音姐、吳耀漢呢啲係鐵腳，大家幾十年交情，都係拍膊頭，友情價！但係呢批演員未必吸引到後生仔，所以有 BabyJohn，女主角用馬來西亞的明禎，佢係網絡紅人。」
唔敢退休
拍劇對夏雨是手板眼見工夫，但搞電影條數唔同計法，香港拍戲成本貴，純本土製作，隨時蝕入肉。
「其實樣樣都難，由搵演員、搞劇本、院線發行，全部要靠人，最後可能血本無歸，壓力好大。《五個小孩的校長》都收幾千萬，咁當然比例好少，但我喺呢個圈有一定資歷，做過幕前又做過幕後，有一定人際關係，我覺得我搞係有我着數嘅地方，我有呢個雄心壯志㗎，我認我係唔化！」
離開港視後，工作量只有大台的三分一，夏雨曾閃過過半退休生活的念頭，但最終怕被淘汰而決定放棄。
「我諗過返加拿大打吓 golf，過吓半退休生活，但靜一靜，諗一諗，你半退休，大家當你退休，有咩唔會諗到你拍，既然仲有可以用嘅，就盡量拍得就拍，直至身體出現狀況先再算。」夏雨說。
火氣十足
入行超過四十年的夏雨原名黃成志， 74年加入無綫，由於轉數快口才佳備受重用，入行不久就當上男主角，火氣十足的他曾因不滿要轉型做中生而出走移民， 2000年回流香港，事業進入人生第二個高峰，先後掃走男配角同視帝，打破小生獨大的局面。
撰文、攝錄：娛樂組
攝影：李溢敏
|
鍾意就快D Share啦！
|
|
|
