掃呢頁CODE去手機

2016年2月4日 星期四

周永恒新歡 Cherie爆欠債整容真相 [壹週刊 - 1352] __,周永恒,整容,M1,

周永恒拖實新歡Cherie到新蒲崗拍拖,沿途二人不停傾偈,搭扶手電梯時又深情對望。探熱針周永恒新歡Cherie爆欠債整容真相因為搞女家暴,搞到同老婆趙頌茹分居的周永恒(Roy),近日搭上只得23歲、有34D的女子組合O.M.G爆乳成員黃芊詠(Cherie),女方更被多個債主在網上組成「復仇者聯盟」追債。上週四(28/1),周永恒與女友十指緊扣行超市,情到濃時,又在商場電梯攬,就算俾人追數周身蟻,一 ...


周永恒拖實新歡 Cherie到新蒲崗拍拖,沿途二人不停傾偈,搭扶手電梯時又深情對望。

探熱針

周永恒新歡 Cherie爆欠債整容真相

因為搞女家暴,搞到同老婆趙頌茹分居的周永恒( Roy),近日搭上只得 23歲、有 34D的女子組合 O.M.G爆乳成員黃芊詠( Cherie),女方更被多個債主在網上組成「復仇者聯盟」追債。上週四( 28/1),周永恒與女友十指緊扣行超市,情到濃時,又在商場電梯攬,就算俾人追數周身蟻,一樣招搖過市。

大方認愛

周永恒雖然未同趙頌茹搞清離婚手續,但身邊女伴一個接一個,與小三 Ruby劉依靜斷纜後,又同周芷儀傳緋聞,最近再被爆搭上女子組合 O.M.G成員黃芊詠( Cherie)。上星期,周永恒在 facebook大方認愛,晒二人親密合照並寫下愛的宣言,指雙方都是有過去的人,讚女友同是音樂狂熱分子,加上信同一宗教,因為音樂而互相吸引。

「 Roy keep住有幫人做音樂,舊年年尾幫 O.M.G做緊首歌,同 Cherie好多機會成日見面;起初都無乜兩句,錄完音就各自散;有次錄完歌大家話一齊食消夜,點知 Roy話要送咗 Cherie返屋企先,咁先知佢哋一齊。 Roy有講過話唔介意公開新戀情,之前發生咁多事,佢都需要有個人喺身邊陪住佢。」 Roy身邊好友透露。

雖然拎到一袋二袋,周永恒還一手攬住女友,非常煙韌。

Cherie主動錫,旁若無人。

當眾攬錫

拍拖僅僅兩個多月,但感情一日千里。熱戀期更加見少陣都唔得,甚至有傳二人已經發展到同居生活。

上週四(一月二十八日),記者發現周永恒拖實 Cherie在位於新蒲崗的 Mikiki廣場拍拖行街,二人在商場閒逛了半粒鐘,沿途雞啄唔斷,搭扶手電梯時又攬到實互望,情到濃時, Cherie更主動親吻男友面頰,旁若無人。

之後二人到地庫超級市場上糧,推住購物車都要拖,全程糖黐豆。在凍肉櫃前, Cherie三心兩意唔知要乜,周永恒上前俾意見, Cherie又不自覺地把頭挨在男友膊頭,十分痴纏。商量後,二人買了牛肉、金菇等火鍋料,返歸㷫烚烚!

Cherie被債主在網上組成「復仇者聯盟」追債,事後她直認因年前被生意拍檔走數,為咗填氹才欠下債項。

其中有債主在網上發布 Cherie的大字報。

Cherie曾被債主威逼拍下自認是性工作者短片,其母家更曾被淋紅油,事件已報警。

推住購物車,但二人堅持拖到實,糖黐豆寸步不離。

暗撻劉依靜( Ruby)又家暴,與老婆趙頌茹離婚的周永恒依然有女埋身。

俾人走數

與周永恒戀情曝光,二十三歲的黃芊詠( Cherie)被網民瘋狂起底,指曾任職金融公司的她曾在網上貼性感自拍照騷身材,更有多個債主在網上組成「復仇者聯盟」向她追債,指 Cherie欠下至少十七萬,「債主」們展示與疑似 Cherie的對話,聲討她賣電話貨不對辦等多宗罪;此外,還爆出一條疑似她讀出身份證及自認是性工作者的短片,短片更疑似是受威逼下所拍。

只得二十三歲,已經往績纍纍!本刊就此訪問 Cherie,曾在先達開過電話鋪的她,直認短片內的女子是她本人,而事件已經交重案組處理。

「之前我喺先達開電話鋪,出 iPhone 6嗰段時間,啲客同我訂機,我收咗啲客訂金後,就將啲錢交俾攞貨嘅 partner,但最後對方無俾任何貨品我,錢亦冇俾番我!但啲客係真金白銀落訂,為咗保住誠信,我就諗辦法搵番批 iPhone俾客人,但自己能力有限,最後搞到周身債!

「有次喺尖沙咀撞到其中兩個債主,俾佢哋捉咗我去後巷叫我還錢,當時我真係冇,之後有個男人摑咗我一巴,仲逼我拍咗條咁嘅片,話如果我唔拍就唔俾我走,又話仲有二、三十人過緊嚟!當時我真係唔識處理,惟有被迫就範,估唔到,佢哋將條片 send咗俾傳媒,我已經報咗警!」 Cherie無奈說。

有 34D巨胸的 Cherie,不時在網上晒性感相。

敢作敢為的 Cherie直認曾打 Botox及開刀整鼻。

Cherie現已融入男友周永恒的朋友圈。

去年尾,周永恒與周芷儀傳出緋聞,二人又在新歌《唔諗你》 MV中上演情慾床戲。

媽咪改觀

與尚未搞清離婚手續,又曾向老婆動粗的周永恒發展, Cherie承認曾遭家人反對。

「初頭同佢一齊媽咪知道都唔鍾意,後來我有事,我 feel到佢拎個心幫我,媽咪見過佢之後亦對佢有改觀。

「我同佢都係有過去嘅人,人人都試過做錯,所以我唔會理人點睇。拍拖係兩個人嘅事,加上佢同阿 Yu只係手續上未搞清楚!將來事無人知,但呢刻,佢喺我生活上已經有好重要嘅位置!」

周永恒與 Cherie拍拖僅僅兩個多月,二人經常在 facebook上載黐頭合照,打得火熱。

敢做敢認

現年 23歲的黃芊詠( Cherie),原名黃詠珊,早年主力學打碟,其後自組 O.M.G組合,於尖沙咀的酒吧出騷跳舞,她不時在 fb晒圈中人合照,包括劉馬車及錢國偉等。

對於被指整容, Cherie說:「我有打過 Botox,個鼻亦動過刀,呢個年代整容好平常,我唔需要否認。」

壞男人

與趙頌茹 14年結束四年婚姻關係的周永恒,短短一年多,已經與不少女子扯上關係,男人不壞,女人果然不愛!

劉依靜( Ruby)

14年, Ruby介入周永恒與趙頌茹的關係,導致二人離婚收場,小三 Ruby坐正,更經常人肉速遞到 Roy在深圳開設的健身室陪過夜,但關係維持一年玩完。

周芷儀( Abbie)

與𡃁模周芷儀合作拍新歌 MV《唔諗你》,當中不乏床上親熱場面,其後二人火速撻着, Roy更在 fb大晒與周芷儀的親密合照。

撰文、攝影、攝錄:娛樂組


鍾意就快D Share啦!