周潤發難捨嘟嘟為子華割愛
【陳偉立北京直擊】國際巨星周潤發再度強襲賀歲檔，並接受《東網巨星》一連五集的專訪，首集《發哥有Say》中，縱橫影壇逾40年，曾與多位影帝影后合作，經典作品無數的的發哥，要數心目中最佳拍檔，原來是七、八十年代電視劇經典螢幕女友鄭裕玲（嘟嘟），他笑言當時對嘟嘟非常傾慕，但問到有否機會再續前緣？發哥笑指嘟嘟已另結新歡黃子華，已將他拋諸腦後。
神級影帝周潤發於1973年加入無綫藝員訓練班，自此展開其璀璨星途，逾40年來一直企硬一線男主角，演繹過無數經典角色，不論是電影《英雄本色》、《監獄風雲》、《賭神》、《秋天的童話》，抑或是劇集《網中人》、《親情》、《上海灘》，至今仍為人津津樂道！前年發哥再次強襲賀歲檔，連續三年都有作品推出，全部都叫好叫座，今年主演的《賭城風雲III》，無論卡士及製作費均屬頂級，相信票房將繼續長紅，有望挑戰15億元人民幣（約17.75億港元）！
嚴選最佳拍檔
早前發哥到北京宣傳《賭III》，接受《東網巨星》專訪，發哥於《發哥有Say》中繼續發揮幽默本色，上山下海無所不談，他直言逾40年的星途幕幕難忘，很高興能與不同的導演及影星合作，造就他屢闖高峰，又笑言很難選出代表作中的代表作，但論最難忘拍檔，發哥閉目回憶一會後終有答案，究竟是《秋》片的鍾楚紅、《英》片的張國榮、《玫瑰的故事》張曼玉、《辣手神探》的梁朝偉、還是最近兩套《賭》片的張家輝？統統非也，發哥回答是七、八十年代初出道時，在電視圈的最佳拍檔鄭裕玲！
記者：發哥同過咁多明星合作，最鍾意係同邊位合作呢？
發哥：如果講電影，因為拍攝時間好短，得兩、三個月，我試過《辣手神探》比較長，拍半年，多數係動作戲，但講到以前電視台，成半年咁長時間，對住同一個人呢，就係我同嘟嘟我哋連續拍兩套劇，《親情》、《網中人》，當時我見佢仲多過見我阿媽，我一擘大眼就見到佢！當時兩套戲都係家庭戲多，佢都係做我女朋友，所以對嘟嘟嘅變化、為人，我哋相處時間長，雖然唔算好了解佢，但該段時間我係投入咗，愛上咗佢！所以我係對嘟嘟非常傾慕。
記者：咁多年仲有冇Keep住聯絡？
發哥：後尾我離開咗TVB喺出面發展，就好少見佢，係一次喺電視，佢做主持訪問，我哋先再見番面，我喺出面經過咁多，佢又有自己感情路線，就各有自己嘅世界
記者：仲有冇機會再合作？
發哥：佢搵到自己至愛喇！佢搵到黃子華喇！唔需要我喇！哈哈！
床戲挑戰尺度
發哥與嘟嘟是七、八十年代最令人印象深刻的螢幕情侶，兩人在《網》劇一幕長吻戲在當時震撼全城，在電影《花城》中更有超激床戲，尺度令人睇到嘩嘩聲！早前嘟嘟曾大讚發哥充滿吸引力兼演技超班，跟他合作令自己更有自信！2010年，兩人在發哥主演電影《讓子彈飛》記者會中碰頭，嘟嘟擔任大會司儀，他們見面即親切抱抱，發哥更讚對方愈來愈年輕。
攝：秦健輝
|
鍾意就快D Share啦！
|
|
|
