2016年2月4日 星期四

欣宜賣曲奇 鄭少秋突擊試食 [壹週刊 - 1352] __,鄭少秋,欣宜,M1,

上週二,欣宜落店sell客,秋官突然現身,見到爹哋的欣宜即時生猛。秋官試餅外,更肉緊錫女支持。探熱針欣宜賣曲奇 鄭少秋突擊試食經濟不景氣,欣宜偏偏逆市創業,與朋友合作賣曲奇。由寄賣到自己打開門口做生意,欣宜手勢好,得到不少圈中朋友支持,但令她最窩心,莫過於老豆鄭少秋親自到場幫襯,一見秋官,欣宜攬到實一實,開心到唔想放手。落鋪做生招牌初次做老闆的欣宜,一有時間便會落鋪幫手做人肉布景,出錢又出力。位於 ...


上週二,欣宜落店 sell客,秋官突然現身,見到爹哋的欣宜即時生猛。秋官試餅外,更肉緊錫女支持。

探熱針

欣宜賣曲奇 鄭少秋突擊試食

經濟不景氣,欣宜偏偏逆市創業,與朋友合作賣曲奇。由寄賣到自己打開門口做生意,欣宜手勢好,得到不少圈中朋友支持,但令她最窩心,莫過於老豆鄭少秋親自到場幫襯,一見秋官,欣宜攬到實一實,開心到唔想放手。

落鋪做生招牌

初次做老闆的欣宜,一有時間便會落鋪幫手做人肉布景,出錢又出力。位於海港城港威三樓、與好友 Bobby共創的 Homie Cookies鋪位雖然不大,但對於主打賣曲奇餅的欣宜來說,控制成本是上策,由於不想花太多支出在人手方面,欣宜幾乎每日都會落鋪幫手,拍檔 Bobby及女友更加長駐店面。

曲奇店今年一月二十一日開張,有欣宜駐場做生招牌下,曲奇每日都售清,一件不留!上週二(二十六日)下午,又見欣宜在店內落手落腳 sell客,除了一般街客,唱片及經理人公司同事,還有睇住欣宜大的阮兆祥,亦有到來幫襯,祥仔大手入貨,老闆欣宜親自招呼。

同日,睇住欣宜大的阮兆祥特登去幫襯,掃了 500蚊曲奇。

秋官即場讚

未久,記者見到篤住把遮慢慢行的秋官鄭少秋出現,老豆大駕光臨,開心到爆的欣宜二話不說就攬,一直渴望父親關心的她,久久不肯放手。

秋官見現場有記者,表現愕然,問到他是否一次過買晒所有曲奇餅,他說:「我一早已訂咗喇。」

「呢啲留番俾我做生意,唔好再叫佢買喇,佢買咗好多啦,已經訂咗廿盒。」欣宜幫口說。

欣宜初次創業,秋官力撐即場試食,食完又猛話:「正呀!」好落力!

之後欣宜又介紹拍檔 Bobby給秋官認識,但見愈來愈多自由行圍觀,欣宜最終提議秋官先行離去,免得場面失控。

秋官拍過的養陰丸廣告,欣宜去年接棒擔任代言人。

有一班圈中 uncle睇住,巨肺欣宜被邀在溫拿演唱會中做嘉賓。

欣宜去年在樂壇成績不錯,頒獎禮後,跟老友許廷鏗、坤哥及胡鴻鈞開心影合照。

Homie Cookies正式開賣當日,許廷鏗、關心妍、胡鴻鈞以及陳慧敏約埋一齊撐場,可見欣宜圈中人緣唔錯。 

秋官經常被拍到跟官晶華及兩個女行街家庭樂。

14年,欣宜在大坑擺街邊檔賣曲奇,跟當時仍未分手的男友 Silas「夫妻檔」 sell客。《蘋果日報》圖片

興趣變生意

據了解,年幾前欣宜事業不順,冇工開大把時間,她便開始學整曲奇,結果興趣變成一盤生意。

「當時欣宜冇歌冇劇冇工開,搞到個人唔係咁開心,但佢一向都鍾意整嘢食,有時整咗自己食唔晒,就送俾朋友,點知個個食過翻尋味,有朋友建議欣宜不如索性整嚟賣俾人;開始除咗擺喺網上賣,亦有放喺中環九記寄賣,不過冇公開係佢整嘅!欣宜仲試過喺大坑火龍徑美食市場擺地攤,只係冇周圍同人講。」欣宜身邊人說。

做番自己的欣宜,近年回復自信,間中也會將性感泳衣照放上網開心 share。

前兩年,欣宜跟林欣彤都曾經歷人生低潮,二人經常互相鼓勵,特別好感情。

去年開始工作量增多,除唱歌外,又拍了幾部電影,欣宜自言難得毋須減肥,可用真身出鏡。

試水溫

娛圈人收入不穩,為求安心將來有保障,不少人都會兼職或投資做生意,甚至加入做零售商,開 pop up store試水溫。

唐詩詠

14年,鍾意食好嘢的唐詩詠,在中環元創方擺短期檔賣台灣三文治洪瑞珍,雖然為期只有七日,但唐詩詠做埋生招牌在 ig鋪相力 sell外,又搵埋曾力追她的洪永城幫手谷宣傳,結果半日賣出 1,600件,要頻頻補貨。

何雁詩

近年拍劇多過唱歌的何雁詩,上月跟朋友合作創立自家品牌 Black Hole,在朋友的有機果汁店租地方寄賣一個月試水溫,自言只投資了幾萬蚊的何雁詩,有女神陳瀅落場幫手。

曲奇藝人

不少藝人都是烹飪高手,因愛鑽研美食而發展成為一盤生意的,為數亦不少,其中以賣曲奇佔大部分。

謝寧

港姐謝寧累積了十四年煮婦經驗, 05年離婚後,將興趣變為事業,開曲奇餅店「曲奇四重奏」,試過一日賣出四百罐佳績,其後更獲六嬸方逸華邀請,負責主理邵氏影城的西餐廳。

古巨基

懂得整曲奇的古巨基, 14年打本俾老婆 Lorriane開曲奇餅店 Alice Wild Luscious,而鍾愛法國甜品的他,標榜朱古力原材料直接由法國入口。

陳敏之

自稱曲奇怪的人妻陳敏之,婚後得老公力撐,投資七位數開鋪「 Blesscuit」賣曲奇,並以她至愛的黑松露作為主打。

謝霆鋒

主持煮食節目《十二道鋒味》大受歡迎後,去年謝霆鋒自創甜酸苦辣四種味道「鋒味曲奇」,開店初期雖然只有一款口味,依然大排長龍。

撰文、攝影、攝錄:娛樂組


鍾意就快D Share啦!
Related Posts Plugin for WordPress, Blogger...