2016年2月4日 星期四

40年回憶  Lam感觸爆喊:好多嘢唔同咗! [壹週刊 - 1352] __,M1,

娛樂偵訊40年回憶 Lam感觸爆喊:好多嘢唔同咗!入行40年,見盡人事變遷,經歷兩段婚姻的阿Lam林子祥倍覺傷感,眼濕濕唱《最愛是誰》,尾段向合作過的創作人致敬時,看到台下的鄭國江、潘源良,唱到《憑着愛》,失控爆喊!「我喺呢度(紅館)睇DavidBowie,亦喺呢度跌落個窿度,40年發生過好多嘢,張生(張耀榮)亦已經走咗,好多嘢唔同咗!」已經68歲,開始倒數人生的阿Lam感觸說。陳皮歌佔半林子祥《 ...


娛樂偵訊

40年回憶  Lam感觸爆喊:好多嘢唔同咗!

入行 40年,見盡人事變遷,經歷兩段婚姻的阿 Lam林子祥倍覺傷感,眼濕濕唱《最愛是誰》,尾段向合作過的創作人致敬時,看到台下的鄭國江、潘源良,唱到《憑着愛》,失控爆喊!

「我喺呢度(紅館)睇 David Bowie,亦喺呢度跌落個窿度, 40年發生過好多嘢,張生(張耀榮)亦已經走咗,好多嘢唔同咗!」已經 68歲,開始倒數人生的阿 Lam感觸說。

陳皮歌佔半

林子祥《佐治地球 40年》演唱會,有別以往!超過一半歌,是陪着他成長的老餅英文歌;提到七五年由美國回流返港,阿 Lam請來當時組成的「玉石樂隊」成員,一同 jam歌合唱成名作《邁步向前》。

充滿回憶的阿 Lam,就連同老婆葉蒨文、 Lam仔林德信合唱,同樣選唱 Peter, Paul& Mary的陳年金曲《 Lemon Tree》。

搵食拍檔莎莉又在台上大爆阿 Lam的古怪習慣,指他鍾意車,屋企有五架車,但卻有車唔揸去坐小巴,因為有長者優惠;平時說話細聲,但上台唱歌就好大聲。

有莎莉、 Lam仔一家人同台嘅阿 Lam,紀念入行四十年,感觸到三度落淚。

雖然經常傳出婚姻有問題,但阿 Lam莎莉這對搵食拍檔,在台上好有默契。

寫定貓紙的莎莉在台上爆老公怪癖,坐在一旁的阿 Lam聽得入神。

03年試過在紅館意外跌落台窿的阿 Lam,仍無懼企在三層樓高台演唱。

阿 Lam齋唱唔跳,但聲嘶力竭,表現肉緊。

喺《 Sunday靚聲王》聽阿 Lam唱歌,聽到興奮打拳嘅白髮婆婆,應邀現身睇演唱會,一見阿 Lam行近,又打 boxing。

鍾意古董車

完騷在後台接受訪問,在台上唱到聲嘶力竭的阿 Lam,就如莎莉所言忽然變得陰聲細氣,細聲到兩呎外已經聽唔到。

阿 Lam表示事前唔知莎莉會講乜!對於屋企有五架車,阿 Lam說:「我唔係買好貴嗰啲,唔會買法拉利、 Audi,我買嘅係古董車, MINI嗰啲,自己打理,係好開心!」

在演唱會上連喊三次,今次開騷,阿 Lam特別感觸!

「諗到四十年咁耐,遇過好多人,好多朋友,大家年紀都大咗,有啲過咗身。唱到嗰啲情歌,就算唔一定係講愛情,都好大感觸,好似《最愛是誰》,係諗起好多回憶、好多人。」阿 Lam說。

一開場,阿 Lam落台攬實 Lam媽唱歌,之後再介紹埋 Lam爸林達志醫生。

葉蒨文魚網絲襪襯皮裙皮靴,被阿 Lam指條裙太短。

阿 Lam派熊啤啤,現場觀眾爭住搶。

撰文、攝影、攝錄:娛樂組


鍾意就快D Share啦!
Related Posts Plugin for WordPress, Blogger...