麥明詩（Louisa）同林作前年9月爆分手，但經常被質疑「掟煲唔掟蓋」。麥明詩曾經喺《後生仔傾吓偈》節目內，被逼向三位男士發出「你覺得我哋之間係咪得純友誼？」短訊，麥明詩揀咗緋聞男友、劍橋書友仔兼藥房太子爺Thomas Chong、吳業坤同楊潮凱，當時馮盈盈叫麥明詩send畀舊愛林作，但麥明詩點都唔肯，更令人覺得佢哋有啲嘢，場面尷尬。
日前，《蘋果》讀者梁太就透過「爆相爆片」，表示傍晚6點15分喺金鐘一間西餐廳遇見麥明詩同林作，梁太話：「嗰段時間唔係太多人，見佢哋坐咗喺室外，林作睇書，麥明詩就食飯，冇乜交談。」梁太話林作全程好專心睇書，反而戴住帽嘅麥明詩警覺性好高，一邊食一邊四處張望。大約6點半，兩人前後腳離開，林作畀錢埋單後走先，麥明詩繼續坐喺度講咗十分鐘電話，之後獨自離開。
《蘋果》致電林作，問係咪同麥明詩復合？林作帶記者遊花園話：「我經過網上微服出巡，多次同網友交流後得知，根本冇任何嘅網民係有興趣知道關於我嘅嘢，所以我唔希望將自己睇成係啲乜嘢人物，所以呢啲冇咩好回應，冇人想知就唔好當係咩一回事，由佢。」林作繼續踩低自己話：「我都知好多網民好煩、好厭，對呢啲冇任何新聞價值，沒完沒了嘅嘢，所以我為佢哋服務，都係唔作任何事端出嚟。」而麥明詩回覆話：「朋友食個tea啫。」
精選娛聞，喺晒《娛果》
http://fb.com/appledailyent
來源 source: http://hk.entertainment.appledaily.com
|
鍾意就快D Share啦！
|
|
|
