尋晚大台節目《深宵美食團》，請咗「小丸子」歐倩怡去梁雪媚有份投資嘅食店開飯，主持Amigo(崔建邦)同張秀文問佢當年點樣識老公郭晉安，歐倩怡好似食咗誠實豆沙包一樣，由點識到點追到手都交待清楚。
兩公婆結婚12年，回帶到1999年，歐倩怡話當時佢同蓋世堡主持旅遊節目，其中一站南韓搵嚟郭晉安同陳健鋒。相處幾日相信郭晉安已經鎖定歐倩怡，於是藉一幕主持坐住吉普車，食住風雪暢遊，一拍完郭晉安即上前捉住吹到手腳彊硬曬嘅歐倩怡，問佢：「你手一定凍，等我幫你暖番！」就係咁，終於捉住佢隻手仔，一拖拖到今時今日。講到呢度，全場大笑，因為大家都估唔到老正嘅郭晉安幾狼，單刀直入咁溝女。至於同樣凍到手腳彊曬嘅蓋世堡，嗰刻當然要食自己聽到呢度，Amigo都忍唔住話：「唔怪得蓋世堡冇得撈」
當年拍完個旅遊節目，歐倩怡同郭晉安再冇同場合作，佢話唔介意之後夫妻檔拍劇，就算有感情線都唔抗拒。
- 食食下，大家都聽住歐倩怡分享，老公郭晉安當年點將佢追到手。
- 99年呢個遊旅節目，撮合咗一對夫妻。
- 唔爆唔知，郭晉安當年追歐倩怡係咁直接，藉幫佢暖番手仔，就從此唔放手。
- 兩公婆恩愛多年，當然過程亦經歷每段婚姻都必然嘅風浪。
- 歐倩怡婚後專心相夫教子，依家一對仔女漸長，佢話可以考慮玩票性質復出拍劇，仲唔介意同老公做對手。
來源 source: http://nextplus.nextmedia.com
|
鍾意就快D Share啦！
|
|
|
