2018年4月23日 星期一

【下一步騎劫靈魂】講獨也有罪?戴耀廷:加辣廿三條 終極以言入罪 __,戴耀廷,

繼政府發聲名譴責後,保皇黨、「愛字堆」等紛紛接力,圍攻戴耀廷在台灣「播獨」,要求政府就《基本法廿三條》立法呼聲,高唱入雲。民主派亦認為,炮打戴耀廷,實 ...




繼政府發聲名譴責後,保皇黨、「愛字堆」等紛紛接力,圍攻戴耀廷在台灣「播獨」,要求政府就《基本法廿三條》立法呼聲,高唱入雲。民主派亦認為,炮打戴耀廷,實際上要為「加辣版《廿三條》」造勢。

就連《人民日報》海外版亦曾經撰文點名針對戴耀廷,聲言落下「實錘」遏制港獨,被視為中央為要求推動《廿三條》立法又一訊號。

然而,有份提出此說的戴耀廷認為,目前保皇黨確實在造勢,但並不等於短期內立法,「正正就係無法律去撳戴耀廷吖嘛,所以咪要立(法)囉。」相信要視二○二○年立法會選舉結果而定:「如果二○二○年立法會選舉結果係民主派可以攞到一半議席就做乜鬼。」

他又形容,保皇黨已不滿足於二○○三年立法時提出的草案,因為根據當年立法版本,根本無法禁制他的言論:「如果佢要禁制到我呢種言論嘅話,佢一定係要再進一步,即係對言論自由限制一定要再進一步,所以就出現加辣版。」造勢同時亦為了讓港人做好「心理準備」。

「將來廿三條立法嘅時候,你唔好諗住○三年嗰個版本,你諗住○三年版本雖然辣你都啃得落,就唔好諗喇,因為我哋嗰個仲勁啲。」

坊間就《廿三條》立法爭論焦點,漸由「立法不立法」,轉移到「加幾多辣」。一旦現在政府再立法,「辣度」會否一下子急升,變成空談「港獨」已構成「分裂國家」;口頭「反對共產黨」即成「顛覆國家政權」,簡而言之,「講獨」也有罪?

「呢個我諗係佢希望做嘅嘢,做唔做到就另一回事。」

按目前本港法例,要得做到以言入罪,戴耀廷解釋會涉及非常複雜的法律爭拗,因草擬法例要時考慮會否牴觸《人權法》;若法例在法院被挑戰,又會如處理?「係咪用人大常委做嘅決定,呢個廿三條立法一定符合基本法,去封咗法院將來審查嘅權力呢?」

「諗吓都唔得,點寫同點執行佢呢?點樣執行諗吓都唔得嘅法律規定呢?」

不過,即使政府日後完成《廿三條》立法,戴耀廷相信法例沒有追溯力,所以還是不能對付他:「就算立咗之後大家咪收聲囉。」

法律難以做到「思想有罪」,藉輿論、教育等手段去劃出各式「思想禁區」卻容易得多。戴耀廷曾明言,自己在今次「播獨風波」中,成為了「殺雞儆猴」中的那隻雞,他在報章專欄中更明確表示,擔心港人思想會被政權箝制,思想變有罪。「我覺得係想令大家唔好再獨立思考,你唔好再去諗嘢,因為所有呢啲問題一定要根據官方立場。」他又提到教育局局長楊潤雄過去曾表明,「港獨可以討論,但一定不可以支持」言論,斥那根本算不上真正的討論。

戴耀廷直言,鋪天蓋地對他的攻擊,其中一個目的正正就是要建立思想禁區:「如果你成功,啲人唔會覺得自己思想唔自由。」一旦政權成功,人民思想會不知不覺受控制,覺得自己不喜歡受限的話題而不自知。

「原來佢嘅思想已經被拑制咗,呢個就係拑制思想自由恐怖嘅地方。」要頂住箝制思想自由嘅行動,必須鼓勵獨立思考。

縱使特首林鄭月娥上週表明,政府沒有就《廿三條》立法的設定時間表,但保皇黨批戴攻勢仍然沒完沒了。

紅線,仍深深劃在戴耀廷身上;雞,仍為猴而死。

撰文:忻肇康

攝影:時事組

相關連結:

【戴耀廷絕地反擊】被屈到台灣鼓吹港獨 戴耀廷:唔係政府鬼有人知我去過

https://bit.ly/2F70aOH

【戴耀庭絕地反擊】鬥垮鬥臭無日無之 戴耀廷:唔排除出現暴力

https://bit.ly/2K81TXw

【疑涉強力部門】憂跟蹤變「銅鑼灣」翻版 戴耀廷嘆報警無用:你估做到嘢咩?

https://bit.ly/2HlsZIY

【狗仔難防】私人飯局遭偷拍 戴耀廷:我也在反跟蹤

https://bit.ly/2Hi7v3S




鍾意就快D Share啦!
Related Posts Plugin for WordPress, Blogger...