即將做爸爸的歌手陳柏宇，前日透露屋企兩頭愛犬因為打交問題未解決，最壞打算或要將狗狗交朋友照顧，惟言論一出，迅即惹來「棄養」的公關災難，遭受網民插爆要B唔要狗外，又與至愛老婆符曉薇鬧意見，有感連老婆也對自己誤解，令向來愛狗如命的他大受打擊！
事緣陳柏宇（Jason）前日自爆家中的鬆獅狗（vv）和老虎狗（Bessie），近月疑為爭新屋地盤而打交，由於太太符曉薇（Leanne）剛宣布懷孕，頓時令準爸爸束手無策，一邊廂愛狗如命，另邊廂擔心愛犬打架不受控制，故才說出最壞打算可能要將狗狗送朋友家暫住。
搵訓練員幫拖
昨日Jason出席活動，提到「棄養」即一臉嚴肅，他表示看到網上好多愛狗之人批評，認為有理性的討論最重要：「棄養依然都係最壞打算，如果最後解決唔到，就焗住一定要行，當然我依家有搵相熟Trainer（訓練員）去教我點樣控制呢件事，唔好惡化，同埋又會改變餵飼方法。」
不過，Jason坦言最嬲是太太誤會他：「我瞓唔着覺，瞞住老婆諗方法，諗呢個最壞打算我仲心痛，隻狗都養咗10年，最心痛係老婆唔識得企喺我嘅角度去諗呢件事，為咗屋企先咁諗、咁打算。」續說：「如果唔控制愛犬會傷害到BB，屆時BB受傷、愛犬又有機會人道毁滅，要理性去想。（網民比喻呢件事為『公關災難』？）我覺得冇嘢係唔應該講，永遠係一個理性嘅討論，如果要包裝先講，就唔係我。」問到Leanne現時明白他用心嗎？他指昨日出門口，太太對他又錫又氹和好如初，但他卻會繼續扮嬲，笑言難得有機會嬲，希望嬲耐一點。
Leanne事後受訪時解釋激嬲老公原因，只因好心提醒一句：「你講嘢小心啲。」誰知講者無心，但Jason聽者有意而「嬲嬲豬」，但強調夫妻已和好：「棄養呢件事根本唔會發生喺我哋身上，時間可以證明一切，我哋兩個真係好錫兩隻狗，如果BB同狗狗揀，我一定揀啲狗，同埋啲狗唔會傷害我，亦都唔會傷害到BB，我諗畀訓練員訓練吓或者住耐啲，啲狗嘅情況應會有改善。」
一定接回狗狗
她又在社交網發文重申：「我哋係唔會唔要任何一隻動物；第二，啲人話我哋教得唔好，如果成日上嚟我屋企嘅朋友都知，vv同Bessie以前唔係咁，係搬咗嚟新屋呢幾個月先打到咁；第三，我哋冇驚過佢傷害BB，因為一個喺地下，一個喺BB床，唔通佢識飛上嚟咬BB？我哋係驚佢哋打傷。」並提到前幾日vv差點咬中Bessie眼球，幸只傷了眉頭，算是不幸中之大幸，認為老虎狗與鬆獅狗打起來甚激烈，身為主人出於愛錫才想盡辦法。又強調交狗給朋友照顧，會經過深思熟慮，會揀與Bessie關係密切的人，且等幾個月BB安定後便將狗接回，她又爆老公最愛Bessie，曾見牠老態而爆喊。
更多新聞，請瀏覽東方日報網頁：
http://orientaldaily.on.cc/
|
鍾意就快D Share啦！
|
|
|
